ছচিয়েল মিডিয়াত প্ৰেম, প্ৰতাৰণা আৰু সংঘাতৰ কাহিনী আমি বহুত শুনিছো আৰু দেখিছো। এইবাৰ ফেচবুকত চাকৰি দিয়াৰ নামত প্ৰৱঞ্চনা আৰু ধন হৰলুকিৰ দৰে এক ঘটনা সংঘটিত হৈছে গোলাঘাটত।
গোলাঘাটৰ ৰাজপথত এজন ব্যক্তিৰ পিঠিত এটাৰ পিছত এটাকৈ পৰিল ঔকিল। নগৰৰ মাজ মজিয়াত দুগৰাকী যুৱতীৰ হাতত এনেদৰে ঔকিল খাবলগীয়া হ’ল এজন লোকে। কাৰণ এটাই প্ৰৱঞ্চনা। চাকৰি দিয়াৰ প্ৰৱঞ্চনা।
প্ৰৱঞ্চনা কৰি গোলাঘাটৰ ৰাজপথত দুগৰাকী যুৱতীৰ হাতত উত্তম মাধ্যম খাবলগীয়া হ’ল নীলোৎপল বৈশ্য নামৰ ব্যক্তি জনে।
ব্যক্তিজনে যুৱতী দুগৰাকীক চাকৰি দিয়াৰ মিছা প্ৰৱঞ্চনাৰে হৰলুকি কৰিছিল নগদ ধন। তিতাবৰ আৰু দেৰগাঁৱৰ এই দুই যুৱতীয়ে ফেচবুকত চাকৰি বিচাৰি নিজ একাউণ্টৰ পৰা এটা লিখা প্ৰকাশ কৰিছিল।
সেই লিখা প্ৰকাশ হোৱাৰ পিছতে কেতিয়াবা কমাৰবন্ধা কেতিয়াবা চকলাটিঙৰ নিবাসী বুলি পৰিচয় দিয়া নীলোৎপল বৈশ্যই ফেচবুক মেছেজৰ জৰিয়তে যুৱতী দুগৰাকীক গোলাঘাট আৰু বোকাখাতত বন্ধন বেংকত চাকৰি দিম বুলি অৱগত কৰে।
ইয়াৰ পিছতেই যুৱতী দুগৰাকীৰ পৰা চাৰে চাৰিহাজাৰকৈ টকা উৎকোচ হিচাপে লয়। আগতীয়া ধন লৈয়েই একেবাৰে অন্তৰ্ধান হ’ল প্ৰৱঞ্চক নীলোৎপল।
ম’বাইল ফ’ন অফ কৰি ৰখা নীলোৎপলৰ পিছে আজি দিন বেয়া আছিল। আজি হঠাৎ গোলাঘাটত যুৱতী দুগৰাকীৰে মুখামুখি হয় প্ৰৱঞ্চক গৰাকীৰ।
তাৰ পিছতেই অথন্তৰ ঘটিল। যুৱতী দুগৰাকীয়ে ইজনীৰ পিছত সিজনীয়ে একেবাৰে নীলোৎপলক চৰ-ভুকু মাৰি উত্তম মাধ্যম সোধালে।
প্ৰত্যক্ষদৰ্শীও ৰৈ নাথাকিল। ৰাজহুৱা পিটনৰ পিছত এতিয়া প্ৰৱঞ্চক নীলোৎপল হ’ল গোলাঘাট সদৰ থানাৰ আলহী।
