অন্ধবিশ্বাসৰ চূড়ান্ত নিদৰ্শন: ক’লা যাদুৰ সন্দেহত খুড়াকৰ শিৰচ্ছেদ, হাতত কটা মূৰ লৈ ৰাজপথত যুৱক
বিজ্ঞানৰ চমকপ্ৰদ উত্থানৰ দিনতো দেশৰ বিভিন্ন প্ৰান্ত অন্ধবিশ্বাসৰ কেনে এক ভয়াৱহ কবলত সোমাই আছে তাৰ এক চূড়ান্ত বহি: প্ৰকাশ ঘটিল মধ্য প্ৰদেশৰ ৰাজপথত।
মধ্য প্ৰদেশৰ এজন ব্যক্তিয়ে ক’লা যাদু কৰাৰ সন্দেহত নিজ খুড়াকৰ শিৰচ্ছেদ কৰি ছিন্ন মুণ্ড আৰু কুঠাৰ হাতত লৈ ৰাজপথত দুই কিলোমিটাৰ পৰ্যন্ত খোজ কাঢ়ে।
ৰাজ্যখনৰ জামোদি আৰক্ষী থানাৰ অধিকাৰক্ষেত্ৰত অৱস্থিত কৰিমাতি গাঁৱত শুকুৰবাৰে এই ঘটনা সংঘটিত হয় বুলি স্থানীয় এজন আৰক্ষী বিষয়াই উল্লেখ কৰে।
জামোদি আৰক্ষী থানাৰ ভাৰপ্ৰাপ্ত বিষয়া শেশমণি মিশ্ৰই কয় যে অভিযুক্ত লালবাহাদুৰ গৌড় শুক্ৰবাৰে তেওঁৰ খুড়াক মাকচুদান সিং গৌড়ৰ ঘৰলৈ গৈছিল। কিন্তু দুয়োৰে মাজত হোৱা তৰ্কৰ পিছত গৌড়ে খুড়াকৰ ডিঙিত কুঠাৰেৰে আঘাত কৰিছিল।
এই আক্ৰমণ ইমানেই তীব্ৰ আছিল যে কুঠাৰৰ ঘাপত খুৰাকৰ শিৰ শৰীৰৰ পৰা ছিন্ন হৈ পৰে।
মিশ্ৰই লগতে যে হত্যাৰ পিছত গৌড়ে কটা মুৰ আৰু কুঠাৰখন হাতত লৈ আৰক্ষী থানা অভিমুখে খোজ কাঢ়ে। অৱশ্যে আৰক্ষীয়ে এই খবৰ লাভ কৰি মাজবাটৰ পৰাই তেওঁক গ্ৰেপ্তাৰ কৰে।
অভিযুক্ত হত্যাকাৰী গৌড়ে কয় যে খুৰাকে ক’লা যাদুৰ জৰিয়তে তেওঁৰ যথেষ্ট সমস্যাৰ সৃষ্টি কৰিছিল। এনে কাম বন্ধ কৰিবলৈ তেওঁ খুড়াকক কেইবাবাৰো মানা কৰিছিল।
শুক্ৰবাৰে তেওঁ খুৰাকৰ ঘৰত উপস্থিত হোৱাৰ পিছত দুয়োৰে মাজত এই বিষয় লৈ কাজিয়া হয় আৰু খুড়াকক কুঠাৰেৰে ঘপিয়াই বুলিও গৌড়ে স্বীকাৰ কৰে।