গুজৰাটৰ বৰোদৰাত এটা সাংঘাটিক ঘটনা সংঘটিত হৈছে। এগৰাকী স্বামীয়ে পত্নীৰ সৈতে অনলাইন লুডু খেলত পৰাস্ত হোৱাৰ পাছত খঙৰ ভমকত নিজৰ ২৪ বছৰীয়া পত্নীৰ পিঠিৰ ৰাজহাড় ভাঙি পেলায়।
তথ্য মতে, গুৰুতৰভাৱে আঘাতপ্ৰাপ্ত মহিলাগৰাকী বৰ্তমান চিকিৎসাধীন হৈ আছে।
জানিব পৰা মতে, মহিলা গৰাকীয়ে তেওঁৰ স্বামীক ঘৰৰ বাহিৰলৈ যোৱাৰ পৰিৱৰ্তে নিজৰ ঘৰতে আৱদ্ধ হৈ থকাটো বিচাৰিছিল আৰু স্বামীক ঘৰত ব্যস্ত কৰি ৰখাৰ বাবে তেওঁৰ সৈতে অ’নলাইন লুডু খেলাৰ বাবে উপদেশ দিছিল।
লুডুখেলত পত্নীয়ে স্বামীক ক্ৰমাগত ভাৱে ৩-৪ বাৰ পৰাস্ত কৰাৰ পাছত স্বামীয়ে খঙত অগ্নিশৰ্মা হৈ পত্নীৰ ওপৰত আক্ৰমণ চলাই পিঠিৰ ৰাজহাড় ভাঙি পেলায়।
স্বামীৰ আক্ৰমণত গুৰুতৰভাৱে আঘাতপ্ৰাপ্ত মহিলা গৰাকীয়ে লগে লগে শৈল্য চিকিৎসকৰ ওচৰলৈ যায় আৰু চিকিৎসাধীন হয়।
পৰৱৰ্তী সময়ত মহিলা গৰাকীয়ে অলপ সুস্থ হৈ উঠাৰ পাছত স্বামী গৃহৰ পৰিৱৰ্তে নিজ মাতৃগৃহলৈ গুচি যায়।
উল্লেখযোগ্য যে, ক’ৰ’না ভাইৰাছৰ সংক্ৰমণ ৰোধৰ বাবে চৰকাৰে ল’কডাউন ঘোষণা কৰাৰ সময়ত দেশত গাৰ্হ্যস্থ হিংসাৰ ঘটনা বৃদ্ধি পাইছে।
