গুৱাহাটী চিকিৎসা মহাবিদ্যালয় হাস্পতালত (জিএমচিএইচ) সংঘটিত হৈছে এক চাঞ্চল্যকৰ ঘটনা। এগৰাকী যুৱতীৰ মৃতদেহ চিকিৎসালয়ত এৰি পলায়নৰ চেষ্টা কৰে এজন যুৱকে। অৱশ্যে তেওঁ সাৰি যাব নোৱাৰিলে।
চিকিৎসালয়ৰ নিৰাপত্তাৰক্ষীয়ে তেওঁক কৰায়ত্ত কৰে। দেওবাৰে নিশা সংঘটিত হয় এই ঘটনা। ভঙাগড় আৰক্ষী থানাৰ আৰক্ষীয়ে ইমৰাণ আলী নামৰ যুৱকজনক জেৰা অব্যাহত ৰাখিছে।
আৰক্ষী সূত্ৰৰ পৰা জানিব পৰা মতে, দেওবাৰে নিশা ইমৰানে গাড়ীৰে যুৱতীগৰাকীৰ মৃতদেহ লৈ আনিছিল। যুৱতীগৰাকীৰ মৃতদেহটো কোনোমতে চিকিৎসালয়ত থৈ তেওঁ কেনেবাকৈ পলাবলৈ চেষ্টা কৰে।
আৰক্ষী আৰু স্থানীয় সূত্ৰৰ পৰা জানিব পৰা মতে যুৱতীগৰাকীৰ মুখত ফেন ওলাই আছিল। ইয়াৰ ভিত্তিত তদন্তকাৰীসকলৰ প্ৰাৰম্ভিক ধাৰণাটো হ’ল যে যুৱতীগৰাকীক বিষাক্ত দ্ৰব্য খুৱাই হত্যা কৰা হৈছিল।
প্ৰত্যক্ষদৰ্শীৰ মতে যুৱকজনে দ্ৰুতগতিত মৃতদেহটো চিকিৎসালয়খনৰ জৰুৰীকালীন বিভাগৰ সন্মুখত থকা ট্ৰলীত ৰাখি থয়। ইয়াৰ পিছত বাহিৰলৈ যোৱা পথেৰে তীব্ৰ বেগেৰে ওলাই যায়। যিহেতু তেওঁৰ গতিবিধি সন্দেহজনক আছিল, সেয়েহে নিৰাপত্তাৰক্ষীয়ে তেওঁক ধৰিবলৈ দৌৰি যায়। চিকিৎসালয়ৰ গেটৰ সমীপতে নিৰাপত্তাৰক্ষীয়ে তেওঁক কৰায়ত্ত কৰিবলৈ সক্ষম হয়।
ভঙাগড় আৰক্ষী থানাৰ এজন বিষয়াই জনোৱা মতে, মৰণোত্তৰ পৰীক্ষাৰ পিছতহে যুৱতীগৰাকীৰ মৃত্যুৰ কাৰণ জানিব পৰা যাব। আৰক্ষীয়েও তেওঁৰ পৰিচয় জানিবলৈ চেষ্টা চলাইছে। ইমৰাণৰো জেৰা চলি আছে। ছোৱালীজনীৰ সৈতে ইমৰাণৰ সম্পৰ্ক কি সেয়াও জানিবলৈ চেষ্টা চলাইছে আৰক্ষীয়ে।
এগৰাকী আৰক্ষী বিষয়াই কয়, “এয়া কোনো সাধাৰণ কাণ্ড নহয়। সকলো দিশ পৰীক্ষা কৰি তদন্ত কৰা হ’ব। ইয়াৰ আঁৰত কি ৰহস্য আছে সেয়াও আমি চাই আছো।”
