বৃহস্পতিবাৰে অৰ্থাৎ ১৬ মে’ৰ নিশা মাজুলী জিলাৰ অন্তৰ্গত তথা শিৱসাগৰ জিলাৰ সমীপৰ ব্ৰহ্মপুত্ৰ দিচাঙৰ সংগম স্থল দবলি চাপৰি তথা জিলা বস্তিৰ বাসিন্দা ৰঘুনাথ মালা নামৰ এজন ব্যক্তিয়ে হাতীৰ গছকত মৃত্যুক আঁকোৱালি ল’ব লগীয়া হয়।
ঘটনাৰ বিৱৰণি মতে অতি দৰিদ্ৰ পৰিয়ালৰ ৰঘুনাথ মালাই বৃহস্পতি বাৰে ঘৰৰ পৰা দিচাং মুখৰ বৃহস্পতিবৰীয়া বজাৰলৈ শাক-পাচলি বিক্ৰী কৰিবলৈ পুৱা ওলাই গৈছিল। দিচাংমুখৰ বজাৰৰ পৰা ঘূৰি আহোতে নিশা হোৱাত পথতে এজাক বনৰীয়া হাতীৰ মুখামুখি হয় ৰঘুনাথ মালা। ফলত হাতীৰ গছকত ৰঘুনাথ মালাৰ মৃত্যু হয়।
আনহাতে ঘটনা সংঘটিত হোৱাৰ লগে লগে স্থানীয় লোকে শিৱসাগৰ বন বিভাগ আৰু আৰক্ষীক খবৰ দিয়াত শিৱসাগৰ বন বিভাগে সেই অঞ্চল মাজুলী জিলাৰ অন্তৰ্গত বুলি মন্তব্য কৰে। আৰু স্থানীয় ৰাইজে তেতিয়া মাজুলী জিলাৰ বন বিভাগক খবৰ দিয়ে।
ইফালে দিনৰ ৩ বজা পৰ্যন্ত মাজুলী জিলাৰ বন বিভাগৰ কোনো দল ঘটনাস্থলীত উপস্থিত হোৱাহি নাই। গতিকে কাইলৈ অৰ্থাৎ ১৮ মে’ত হে ৰঘুনাথ মালাৰ মৰণোত্তৰ পৰীক্ষা সম্পন্ন কৰিব পৰা যাব।
উল্লেখ্যযোগ্য যে ৰঘুনাথ মালাৰ প্ৰকৃত ঘৰ শিৱসাগৰ জিলাৰ দিচাংমুখৰ বলমা গাঁৱত। খেতি কৰিবলৈ আৰু গৰু পোহিবলৈ পৰিয়ালসহ দবলি চাপৰিলৈ উঠি গৈছিল। মৃত ৰঘূনাথে পত্নী, দুজন পুত্ৰ আৰু এগৰাকী কন্যাক ইহ সংসাৰত এৰি থৈ গৈছে।
আনহাতে মুখ্য মন্ত্ৰী সমষ্টিৰ বন কিম্বা আৰক্ষী বিভাগে হাতীৰ গছকত মৃত্যুহোৱা এজন ব্যক্তিৰ মৃতদেহ উদ্ধাৰ কৰি মৰণোত্তৰ পৰীক্ষা কৰিবলৈ খবৰ পোৱাৰ পিছতো ২০ ঘন্টাত কৈ অধিক সময় অতিবাহিত হোৱাৰ পিছতো ঘটনাস্থলীত উপস্থিত হ’ব নোৱাৰাত সৰ্বত্ৰে তীব্ৰ প্ৰতিক্ৰিয়াৰ সৃষ্টি কৰিছে।
