এটা সামান্য ভিডিঅ’ৰ বাবেই গ্ৰেপ্তাৰৰ বাবে সম্মুখীন হ’ল গুজৰাটৰ ছুৰাটনিবাসী এজন যুৱক।
কিষাণ ৰূপানী (২৮) নামৰ যুৱকজনক ৰাজ্যখনৰ মুখ্যমন্ত্ৰী বিজয় ৰূপানীৰ এটা সম্পাদিত ভিডিঅ’ সামাজিক মাধ্যমত প’ষ্ট কৰাৰ বাবে সোমবাৰে আৰক্ষীয়ে গ্ৰেপ্তাৰ কৰে।
যুৱকজনৰ ভাষ্য অনুসৰি আৰক্ষীয়ে তেওঁৰ ওপৰত এটা গোচৰ ৰুজু কৰিছে।
অৱশ্যে যুৱকজনে শীঘ্ৰেই জামিন লাভ কৰিবলৈ সক্ষম হয়।
ছুৰাটৰ অপৰাধ নিয়ন্ত্ৰণ শাখাই জনোৱামতে, যুৱকজন সামাজিক মাধ্যমত তীব্ৰভাৱে সক্ৰিয় আৰু তেওঁৰ ‘gujju_smilly’ নামৰ ইনষ্টাগ্ৰাম পেজটোত ৫,০০,০০০ৰো অধিকসংখ্যক ফলোৱাৰছ আছে।
পেজটোত যুৱকজনে তেওঁ ৰাজ্যখনৰ মুখ্যমন্ত্ৰীৰ এটা ভিডিঅ’ প’ষ্ট কৰে, য’ত মাৰ্কিন পপষ্টাৰ টেইলৰ চুইফটৰ ‘আই নিউ ইউ ৱেৰ ট্ৰাবল’ (I Knew You Were Trouble) নামৰ গানটো ব্যৱহাৰ কৰা হৈছে।
ভিডিঅ’টো প’ষ্ট কৰাৰ লগে লগে সামাজিক মাধ্যমত ভাইৰেল হৈ পৰে।
আনহাতে, যুৱকজনৰ দেউতাক অৰবিন্দভাই ৰূপানীয়ে সংবাদ মাধ্যমক কয় যে তেওঁ পুত্ৰই ঘণ্টা ঘণ্টাধৰি মোবাইল ফোন লৈ বহি থকা দেখা পায়, কিন্তু দেউতাকে পুত্ৰক এটা নিৰীহ ল’ৰা বুলি অভিহিত কৰে।
”মই বিশ্বাস কৰো যে সি মুখ্যমন্ত্ৰীৰ দৰে এজন ব্যক্তিৰ প্ৰতি অপমানজনক একো কাম কৰা নাই।”- দেউতাকে কয়।
আৰক্ষীয়ে কয় যে অভিযুক্ত যুৱকজনে কোৱা অনুসৰি ভিডিঅ’টো তেওঁ সামাজিক মাধ্যমত ‘লাইক’ পাবৰ বাবে প’ষ্ট কৰিছিল।
ইতিমধ্যে আৰক্ষীয়ে যুৱকজনৰ মোবাইল ফোনটো জব্দ কৰি ফৰেনচিক লেবৰেটৰীলৈ অধিক তথ্যৰ বাবে প্ৰেৰণ কৰিছে।
