বিষ মিহলোৱা মাংস খুৱাই ১২ টা ৰাস্তাৰ কুকুৰক হত্যা কৰা হৈছে! পশ্চিমবংগৰ জলপাইগুৰিৰ কোতৱালি থানাৰ মোহিত নগৰ অঞ্চলত সংঘটিত এই ঘটনাই অঞ্চলটোত চাঞ্চল্যৰ সৃষ্টি কৰিছে।
প্ৰতিশোধৰ জুই ইমান ভয়ানক হ’ব পাৰে তাক লৈ প্ৰশ্ন উত্থাপন হৈছে। প্ৰতিশোধ ল’বলৈ এজন ব্যক্তি কিমান দূৰলৈ যাব পাৰে? এনে ঘটনা নতুন নহয়, কিন্তু এনে দৃষ্টান্ত কিয় বাৰে বাৰে দেখা গৈছে?
আৰক্ষী আৰু স্থানীয় সূত্ৰৰ পৰা জানিব পৰা মতে, মোহিত নগৰ অঞ্চলৰ এজন লোকে ৰাস্তাৰ কুকুৰবোৰক বিষ খুৱাই হত্যা কৰাৰ অভিযোগ উত্থাপন হৈছে। স্থানীয় সূত্ৰৰ পৰা জানিব পৰা মতে, লোকজনে মাংসৰ লগত বিষ মিহলাই নাৰকীয়ভাৱে নিৰীহ প্ৰাণীকেইটাক হত্যা কৰিছিল।
কিন্তু এনে আসুৰিক আচৰণ কিয় কৰিলে? স্থানীয় সূত্ৰৰ পৰা জানিব পৰা মতে, পথত এটা ৰাস্তাৰ কুকুৰে কামোৰাৰ ফলত অভিযুক্তৰ ছাগলীটোৰ মৃত্যু হয়। তেতিয়াই তেওঁৰ মাজত প্ৰতিশোধৰ ভাৱ জাগি উঠে।
অভিযুক্তই মৃত ছাগলীটোক কাটি বিষ মিহলাই মাংসখিনি ৰান্ধি অঞ্চলটোৰ ৰাস্তাৰ কুকুৰকেইটাক খুৱাইছিল। যাৰ বাবে অঞ্চলটোৰ ১২টা কুকুৰৰ মৃত্যু হয়। এই ঘটনাৰ বিৰুদ্ধে পশুপ্ৰেমী সংস্থা স্প’ৰে সৰৱ হৈছে । তেওঁলোকৰ ফালৰ পৰা স্থানীয় আৰক্ষী থানাত গৈ লিখিত অভিযোগ দাখিল কৰিছে।
স্প’ৰৰ এগৰাকী সদস্য কয়, ‘বৃহস্পতিবাৰে আমি খবৰ পাইছিলোঁ যে এই অঞ্চলৰ প্ৰায় ১৩টা কুকুৰক বিষ খুৱাই হত্যা কৰা হৈছে। অৱশ্যে এতিয়াও এটা কুকুৰ জীয়াই আছে। কিন্তু বাকী কুকুৰবোৰৰ মৃত্যু হৈছে। এইটো প্ৰথমবাৰৰ বাবে নহয়। এই ধৰণৰ ঘটনা ইয়াৰ পূৰ্বেও বহুবাৰ সংঘটিত হৈছে। এইবাৰ আমাৰ হাতত সমগ্ৰ ঘটনাৰ প্ৰমাণ আছে।”
সূত্ৰ অনুসৰি ৰাজ্যৰ পশুপ্ৰেমী সংগঠনসমূহে এই ঘটনা সন্দৰ্ভত ইতিমধ্যে প্ৰাক্তন কেন্দ্ৰীয় মন্ত্ৰী তথা পৰিৱেশ কৰ্মী মানেকা গান্ধীৰ সৈতে যোগাযোগ কৰিছে। তেওঁ জলপাইগুৰি কাণ্ডক লৈ উদ্বেগ প্ৰকাশ কৰিছে। লগতে ৰাজ্যৰ আৰক্ষীক বিহিত ব্যৱস্থা ল’বলৈ অনুৰোধ জনাইছে।
