লোকসভাৰ কাৰ্য্যক্ৰমণিকা অহা ২০ জুনৰ পৰা আৰম্ভ হ’ব। সংসদলৈ প্রথমবাৰৰ বাবে নিৰ্বাচিত হোৱা সাংসদসকলে অধীৰ আগ্ৰহেৰে সংসদৰ কাৰ্য্যক্ৰমণিকা আৰম্ভ হোৱালৈ বাট চাই আছে।
অসমত এইবাৰ যোৰহাটৰ পৰা তপন কুমাৰ গগৈ, তেজপুৰৰ পৰা পল্লৱ লোচন দাস, মঙলদৈৰ পৰা দিলীপ শইকীয়া, গুৱাহাটীৰ পৰা কুইন ওজা, বৰপেটাৰ পৰা আব্দুল খালেক, শিলচৰৰ পৰা ৰাজদ্বীপ ৰয়, কৰিমগঞ্জৰ পৰা কৃপানাথ মাল্লা, স্বায়ত্ত শাসিত পৰিষদৰ হৰেন সিং বে, নগাঁৱৰ পৰা প্ৰদ্যুৎ বৰদলৈ প্ৰথমবাৰলৈ সংসদলৈ জনপ্ৰতিনিধি হিচাপে নিৰ্বাচিত হৈছে।
মঙলদৈ লোকসভা সমষ্টিৰ বিজেপিৰ সাংসদ দিলীপ শইকীয়া সাজু হৈ পৰিছে আগন্তুক সংসদৰ কাৰ্য্যক্ৰমণিকাৰ বাবে। মঙলদৈ সমষ্টি আৰু অসমৰ বহুকেইটা প্ৰশ্নৰে সৈতে তেওঁ লোকসভাৰ মজিয়াত প্ৰথমটো প্ৰশ্ন কৰাৰ বাবে ইচ্ছা প্ৰকাশ কৰে।
সংবাদ মাধ্যমৰ আগত শইকীয়াই মনৰ ভাৱ ব্যক্ত কৰি কয় যে যদিহে লটাৰীত মোৰ নামটো প্ৰথম প্ৰশ্ন কৰ্তা হিচাপে আহে তেন্তে মই নথৈ সুখী হম।
আনহাতে, তেওঁ সংসদৰ শ্ৰেষ্ঠ সাংসদ হিচাপে নিৰ্বাচিত হোৱাৰ বাবে প্ৰথমৰ পৰা চেষ্টা কৰিব বুলিও গুৰুত্বপূৰ্ণ মন্তব্য কৰে। অবশ্যে এইক্ষেত্ৰত অভিজ্ঞতা যথেষ্ট গুৰুত্বপূৰ্ণ হ’ব বুলি তেওঁ মত প্ৰকাশ কৰে।
আনহাতে, সংসদৰ মজিয়াত শইকীয়াই আগন্তুক সময়ত মঙলদৈ লৈ ৰে’ল যোগাযোগ সম্প্ৰসাৰণৰ প্ৰসংগতো প্ৰশ্ন উত্থাপন কৰিব বুলি কয়। লগতে পথৰুঘাটক ৰাষ্ট্ৰীয় স্মাৰক হিচাপে ঘোষণা কৰাৰ ক্ষেত্ৰত কি কি আসোৱাহ আছে সেইখিনি আতৰাই শীঘ্ৰে পথৰুঘাটক ৰাষ্ট্ৰীয় স্মাৰক হিচাপে ঘোষণা কৰাৰ বাবে দাবী উত্থাপন কৰিব বুলি সংবাদ মাধ্যমৰ আগত মন্তব্য কৰে।
