ইতিহাস সৃষ্টি কৰি ভাৰতীয় দললৈ নিৰ্বাচিত মণিপুৰৰ বাওঁহতীয়া মিডিয়াম পেচাৰ ৰেক্স সিং
বক্সিং, ভাৰোত্তোলন, ফুটবল, হকী আদি খেলত আধিপত্য বিস্তাৰ কৰাৰ পাছত এইবাৰ ক্ৰিকেট। দেশৰ ক্ৰীড়াক্ষেত্ৰত এক সুকীয়া স্থান দখল কৰিবলৈ সক্ষম হোৱা মণিপুৰে প্ৰথমবাৰৰ বাবে দেশৰ ক্ৰিকেটৰ মূল পৰ্যায়ত অংশ লৈয়ে ক্ৰিকেটাৰ ৰেক্স সিঙৰ জৰিয়তে চমক সৃষ্টি কৰিবলৈ সক্ষম হয়।
দক্ষিণ আফ্ৰিকাৰ বিৰুদ্ধে অনুষ্ঠিত হ’ব লগীয়া ১৯ অনূৰ্ধ্বৰ টেষ্ট শৃংখলাৰ বাবে ঘোষণা কৰা ভাৰতীয় দলত অন্তৰ্ভুক্ত হৈছে মণিপুৰৰ এইগৰাকী ১৮ বছৰীয়া বাওঁহতীয়া মিডিয়াম পেচাৰ ৰেক্স সিং। ভাৰতীয় দললৈ নিৰ্বাচিত ৰেক্স সিং হ’ল মণিপুৰৰ প্ৰথমগৰাকী ক্ৰিকেটাৰ। দুখন মেচৰ টেষ্ট শৃংখলাটো অহা ২০ ফেব্ৰুৱাৰিৰ পৰা আৰম্ভ হ’ব।
উল্লেখ্য যে যোৱা বছৰৰ ডিচেম্বৰত অনুষ্ঠিত হোৱা ১৯ অনূৰ্ধ্ব কোচ বিহাৰ ট্ৰফীৰ এখন মেচত ৰেক্স সিঙে অৰুণাচলৰ বিৰুদ্ধে এটা ইনিংছত ১০টা উইকেট দখল কৰি ক্ৰিকেট জগতত চাঞ্চল্যৰ সৃষ্টি কৰিছিল।
কোচ বিহাৰ ট্ৰফীত আগবঢ়োৱা প্ৰদৰ্শনৰ বাবেই পাছত তেওঁক মণিপুৰৰ ৰঞ্জী দলত অন্তৰ্ভুক্ত কৰা হৈছিল। সদ্য সমাপ্ত ৰঞ্জী ট্ৰফীৰ দুখন মেচত অংশ লোৱা ৰেক্স সিঙে বিশেষ সফলতা লাভ কৰিব নোৱাৰিলেও দক্ষিণ আফ্ৰিকাৰ বিৰুদ্ধে ভাল প্ৰদৰ্শন আগবঢ়াব বুলি আশা প্ৰকাশ কৰিছে ক্ৰিকেট প্ৰেমীসকলে।