সম্পূৰ্ণ ৮ ঘন্টা জেৰাৰ পিছত আজি গধূলি চিবিআই- এ গ্ৰেপ্তাৰ কৰে দিল্লীৰ উপমুখ্যমন্ত্ৰী মনীষ চিছ’দিয়াক। দীৰ্ঘদিন ধৰি কেন্দ্ৰীয় তদন্তকাৰী সংস্থাটোৰ জেৰাৰ সন্মুখীন হৈ অহাৰ পিছত আজি সুৰা কেলেংকাৰী গোচৰত চিছ’দিয়াক গ্ৰেপ্তাৰ কৰে চিবিআই- এ।
আবকাৰী কেলেংকাৰীত চিছ’দিয়া জড়িত থকা বুলি এজন আবকাৰী বিষয়াই প্ৰদান কৰা ভাষ্যৰ ভিত্তিতেই দিল্লীৰ উপ ৰাজ্যপালে জুলাই মাহত মনীষ চিছ’দিয়াৰ বিৰুদ্ধে তদন্ত আৰম্ভ কৰিবলৈ নিৰ্দেশ দিছিল। অৱশেষত ১৭ আগষ্টত গোচৰ ৰুজু কৰা হৈছিল মনীষ চিছ’দিয়াৰ বিৰুদ্ধে।
এই গোচৰত যোৱা ১৯ ফেব্ৰুৱাৰী তাৰিখে মনীষ চিছ’দিয়াক চিবিআই-এ চমন জাৰি কৰিছিল যদিও ব্যস্ততাৰ দোহাই দি ২৬ ফেব্ৰুৱাৰীৰ দিনা হে চিবিআইৰ কাৰ্যালয়ত হাজিৰ হৈছিল চিছ’দিয়া।
ইয়াৰ পিছতেই আজি গোটেই দিনটো চিবিআই-এ জেৰা কৰাৰ অন্তত আবিকাৰীৰ কেলংকাৰী আৰু প্ৰমাণ নষ্ট কৰাৰ অভিযোগত গ্ৰেপ্তাৰ কৰা হ’ল দিল্লীৰ উপ মুখ্যমন্ত্ৰী গৰাকীক।
আজি পুৱাতেই চিছ’দিয়াই নিজে গ্ৰেপ্তাৰ হোৱাৰ সম্ভাৱনাৰ কথা ব্যক্ত কৰি জেললৈ যাবলৈ সাজু বুলি এটি টুইটো প্ৰকাশ কৰিছিল।
চিছ’দিয়াৰ গ্ৰেপ্তাৰে এতিয়া সমগ্ৰ দেশৰ ৰাজনৈতিক মহলত সৃষ্টি কৰিছে তীব্ৰ চাঞ্চল্যৰ।
