প্ৰাক্তন প্ৰধান মন্ত্ৰী ড০ মনমোহন সিঙে দেওবাৰে প্ৰধান মন্ত্ৰী নৰেন্দ্ৰ মোদীৰ পাঁচ বছৰীয়া কৰ্যকালটোক ‘’অত্যন্ত পীড়াদায়ক তথা ধ্বংসাত্মক’’ বুলি অভিহিত কৰিছে।
ড০ সিঙে কয় যে প্ৰধান মন্ত্ৰী নৰেন্দ্ৰ মোদীক প্ৰস্থানৰ বাট দেখুৱাই দিয়া উচিত কিয়নো তেওঁৰ পাঁচ বছৰীয়া কাৰ্যকালটো দেশৰ যুৱসকল, কৃষক, ব্যৱসায়ী আৰু প্ৰতিটো গণতান্ত্ৰিক প্ৰতিষ্ঠানৰ বাবে ‘’অত্যন্ত পীড়াদায়ক তথা ধ্বংসাত্মক’’ হিচাপে বিবেচিত হৈছে।
অসমৰ পৰা ৰাজ্যসভাত প্ৰতিনিধিত্ব কৰা ড০ সিঙে সংবাদ প্ৰতিষ্ঠানক দিয়া এক সাক্ষাৎকাৰত কয় যে জনসাধাৰণে ‘’সৰ্বাংগীণ বিকাশত বিশ্বাস নকৰা আৰু কেৱল বিবাদৰ জৰিয়তে ইয়াৰ ৰাজনৈতিক অস্তিত্ব বৰ্তাই ৰখাৰ বাবে চিন্তিত হৈ থকা’’ শাসনকালক উৎখাত কৰাৰ সিদ্ধান্ত লৈছে।
ড০ সিঙে অভিযোগ কৰে যে বিগত পাঁচ বছৰত দুৰ্নীতিৰ পৰিমান ‘’অকল্পনীয় মাত্ৰা’’ চুইছেগৈ। তেওঁ লগতে বিমুদ্ৰাকৰণ সম্ভৱত: স্বাধীন ভাৰতৰ আটাইতকৈ ‘’বৃহৎ কেলেংকাৰি’’ আছিল বুলিও কয়।
প্ৰাক্তন প্ৰধান মন্ত্ৰী গৰাকীয়ে লগতে প্ৰধান মন্ত্ৰী মোদীৰ পাকিস্তান সন্দৰ্ভত নীতিক ‘’ফটা জোলোঙা’ বুলি উল্লেখ কৰি ইয়াক অনিমন্ত্ৰিতভাৱে পাকিস্তানলৈ যোৱাৰ পৰা আৰম্ভ কৰি সন্ত্ৰাসবাদী আক্ৰমণৰ তদন্তৰ সৈতে সম্পৰ্কিত ‘প্ৰছন্ন’ আই এছ আইক পাঠানকোটৰ বিমান ঘাটিলৈ আমন্ত্ৰণ কৰালৈকে এলানি ‘লুটি বাগৰ মৰা’ কাৰ্যৰ সমষ্টি বুলি অভিহিত কৰে।
তেওঁ কয় যে জনসাধাৰণে এই চৰকাৰখনৰ কামকাজত অতিষ্ঠ হৈ ভিতৰি ইয়াৰ বিৰুদ্ধে এক জনমত গঠন কৰিছে।
প্ৰাক্তন প্ৰধান মন্ত্ৰী গৰাকীয়ে কয় যে মোদী চৰকাৰৰ পাঁচ বছৰ শাসন তথা দায়বদ্ধতাৰ ব্যৰ্থতাৰ এক দুৰ্ভাগ্যজনক কাহিনী।
‘’২০১৪ চনত মোদীজীয়ে ‘অচ্ছে দিন’ৰ প্ৰতিশ্ৰুতিৰে ক্ষমতালৈ আহিছিল। তেওঁৰ পাঁচ বছৰীয়া কাৰ্যকালটো দেশৰ যুৱ, কৃষক, ব্যৱসায়ী আৰু প্ৰতিটো গণতান্ত্ৰিক প্ৰতিষ্ঠানৰ বাবে ‘’অত্যন্ত পীড়াদায়ক তথা ধ্বংসাত্মক,’’-তেওঁ কয়।
