গুৱাহাটী চাহ নিলাম কেন্দ্ৰত মঙলাবৰে হোৱা নিলামত এক কিলোগ্ৰাম চাহ ৫০,০০০ টকাত বিক্ৰী হয়।
গুৱাহাটী চাহ নিলাম কেন্দ্ৰত বৰ্তমানলৈ হোৱা চাহৰ নিলামৰ ক্ষেত্ৰত এয়া এক অভিলেখ।
সূত্ৰৰ পৰা লাভ কৰা খবৰ অনুসৰি প্ৰতি কেজিত ৫০,০০০ টকা মূল্যত বিক্ৰী হোৱা চাহবিধ অসমৰ চাহ বাগিছাত প্ৰস্তুত হোৱা মনোহাৰী গোল্ড চাহ বুলি জানিব পৰা গৈছে।
উল্লেখযোগ্য যে, ২০১৮ চনত হোৱা নিলামৰ সময়ত মনোহাৰী গোল্ড চাহে প্ৰতি কেজিত ৩৯,০০১ টকা লাভ কৰিছিল।
অৰুণাচলৰ দনি পলো চাহ বাগিছাৰ গোল্ডেন নিডলী ভেৰাইটি নামৰ চাহ বিধে মনোহাৰী গোল্ড চাহক অতিক্ৰম কৰি প্ৰতি কেজিত ৪০,০০০ টকা লাভ কৰিবলৈ সক্ষম হৈছিল।
গুৱাহাটী চাহ নিলাম ক্ৰয় সংস্থাৰ সাধাৰণ সম্পাদক দিনেশ বিহানীয়ে সংবাদ মাধ্যমৰ আগত চাহৰ ৰাজহুৱা নিলামত মনোহাৰী গোল্ড চাহে আটাইতকৈ বেছি মূল্য লাভ কৰিবলৈ সক্ষম হৈছে বুলি উল্লেখ কৰে।
ডিব্ৰুগড়ৰ মনোহাৰী চাহ বাগিছাৰ স্বত্তাধিকাৰী ৰাজন লোহিয়াই প্ৰকাশিত এটা খবৰত তেওঁলোকে চলিত বৰ্ষত মাত্ৰ পাঁচ কিলোগ্ৰামহে বিশেষ অৰ্থ’ডক্স চাহ প্ৰস্তত কৰিছে বুলি উল্লেখ কৰিছে।
চলিত বৰ্ষৰ বতৰ চাহ উৎপাদনৰ বাবে বৰ এটা সুবিধাজনক নহয় বুলি মন্তব্য কৰি লোহিয়াই কয় যে সোণালী চাহ, চাহ গছৰ পাতৰ পৰা নহয় অতি সৰু কলিৰ পৰাহে প্ৰস্তত কৰা হয়।
‘‘এইটো এটা ক্লান্তিকৰ আৰু কঠিন প্ৰক্ৰিয়া’’-লোহিয়াই কয়।
সোণালী চাহ প্ৰস্তুত কৰাৰ বাবে মে’ আৰু জুন মাহৰ ৰাতিপুৱাৰ ভাগত চাহ কলি তোলা হয়।
সৌৰভ ট্ৰেডাৰ্চৰ মনজিলাল মহেশ্বৰীয়ে নিলামৰ সময়ত চাহখিনি ক্ৰয় কৰা বুলি খবৰ লাভ কৰা হৈছে। একেগৰাকী ব্যক্তিয়ে বিগত বৰ্ষত ২ কিলোগ্ৰাম মনোহাৰী গোল্ড চাহ ক্ৰয় কৰিছিল।
