বিশ্ব বক্সিঙৰ ছেমিত প্ৰৱেশ মেৰী কমৰ, গঢ়িলে আন এক অনবদ্য বিশ্ব ৰেকৰ্ড
মহিলা বক্সিং বিশ্ব প্ৰতিযোগিতাত ৫-০-ৰ স্পষ্ট ব্যৱধানত প্ৰতিদ্বন্দ্বীক হৰুৱাই ছেমি ফাইনেলত প্ৰৱেশ কৰিছে মেৰী কম। ইয়াৰ লগে লগে মেৰীৰ জৰিয়তে প্ৰথমটো পদক নিশ্চিত হয় ভাৰতৰ।
ইয়াৰ উপৰি ছেমিত প্ৰৱেশৰ লগে লগে মেৰীয়ে গঢ়িলে আন এক অনবদ্য বিশ্ব ৰেকৰ্ড। বিশ্ব চেম্পিয়নশ্বিপৰ ইতিহাসত আঠটা পদক জয় কৰা প্ৰথম গৰাকী বক্সাৰ হিচাপে পৰিগণিত হ’ল মেৰী।
ৰাছিয়াত চলি থকা শীৰ্ষ প্ৰতিযোগিতাখনৰ ৫১ কেজিৰ শাখাৰ আজি ৰাতিপুৱা অনুষ্ঠিত হোৱা কোৱাৰ্টাৰ ফাইনেলত মেৰীয়ে ২০১৬ৰ ৰিঅ’ অলিম্পিকৰ ব্ৰঞ্জ মেডেলিষ্ট কলম্বিয়াৰ ইনগ্ৰিট ভেলেন্সিয়াক পৰাস্ত কৰে।
বক্সিং কুইন মেৰীৰ এতিয়া লক্ষ্য সপ্তমটো স্বৰ্ণ অৰ্জনৰ। ইয়াৰ পূৰ্বে তেওঁ এই প্ৰতিযোগিতাখনত ছটাকৈ গ’ল্ড মেডেল অৰ্জন কৰি থৈছে আৰু ২০০১ চনত ৰূপৰ পদক অৰ্জন কৰিছিল।
অপ্ৰতিৰোধ্য মেৰীয়ে এতিয়া অহা ১২ অক্টোবৰত অনুষ্ঠিত হ’ব লগীয়া ছেমি ফাইনেলত তুৰ্কীৰ দ্বিতীয় বাচনিৰ বক্সাৰ বুচেনাজ চাকিৰ’গলু (Busenaz Cakiroglu)ৰ বিৰুদ্ধে অৱতীৰ্ণ হ’ব। বুচেনাজ য়ুৰোপিয়ান চেম্পিয়শ্বিপ আৰু য়ুৰোপিয়ান গেইমছৰ গ’ল্ড মেডেলিষ্ট।
উল্লেখ্য যে ইয়াৰ পূৰ্বে প্ৰতিযোগিতাখনত মেৰীয়ে ৬টা স্বৰ্ণ আৰু এটা ৰূপৰ পদকেৰে মুঠ ৭টা পদক অৰ্জন কৰিবলৈ সক্ষম হৈছিল যদিও এইবাৰৰ মেডেলটো হ’ব ৫১ কেজি শাখাৰ প্ৰথম মেডেল।