ক’ৰ’নাৰ এটা সঠিক সমাধান নোলোৱা পৰ্যন্ত সম্পূৰ্ণ প্ৰশিক্ষণ সম্ভৱ নহয় : মেৰীকম
কেন্দ্ৰীয় ক্ৰীড়া মন্ত্ৰ্যালয়ে চতুৰ্থ পৰ্যায়ৰ ল’কডাউনৰ সময়ত দেশৰ ক্ৰীড়া প্ৰকল্প সমূহৰ লগতে ষ্টেডিয়াম সমূহত অনুশীলন আৰম্ভ কৰাৰ বাবে অনুমতি দিয়াৰ পাছত ছয় বাৰৰ বিশ্ব চেম্পিয়ন মেৰী কমে যেতিয়ালৈ ক’ৰ’না ভাইৰাছৰ সমাধান নোলায় তেতিয়ালৈ বক্সিঙ ৰিঙত সতীৰ্থৰ সৈতে অনুশীলনত নানামে বুলি উল্লেখ কৰে।
‘‘প্ৰত্যক্ষভাৱে সংস্পৰ্শলৈ অহা খেলত আপুনি ৰিস্ক ল’ব নোৱাৰে। ই ভয়াবহ হ’ব পাৰে,’’ মেৰীকমে কয়।
‘‘মই ফিটনেছৰ অনুশীলন সমূহ আৰম্ভ কৰিম কিন্তু বক্সিঙৰ কিছু সংখ্যক অনুশীলন এৰাই চলিব লাগিব,’’ তাৰকা বক্সাৰ গৰাকীয়ে লগতে কয়।
উল্লেখযোগ্য যে, ল’কডাউনৰ সময়ত মেৰীকম মণিপুৰৰ নিজ গৃহত আৱদ্ধ হৈ আছে।
কিছুদিন পূৰ্বে মেৰীকমৰ সন্তানৰ জন্মদিনত মণিপুৰ আৰক্ষীয়ে খেলুৱৈ গৰাকীৰ ঘৰত উপস্থিত হৈ কেক উপহাৰ দিছিল।
ভাৰতৰ ক্ৰীড়া মন্ত্ৰী কিৰেণ ৰিজিজুৱে তৃতীয় পৰ্যায়ৰ ল’কডাউনৰ সময়ত গৃহ বিভাগে অনুমতি নিদিয়াকৈ ক্ৰীড়া প্ৰকল্প সমূহ মুকলি কৰিব পৰা নাযাব বুলি উল্লেখ কৰি ল’কডাউন সমাপ্ত হলে পুনৰ প্ৰশিক্ষণ আৰম্ভ কৰিব পৰা যাব বুলি মন্তব্য কৰিছিল।