চাৰি মাহ আগতে ড’নাল্ড ট্ৰাম্পে দ্বিতীয়টো কাৰ্যকালৰ বাবে আমেৰিকাৰ ৰাষ্ট্ৰপতি হিচাপে দায়িত্বভাৰ গ্ৰহণ কৰিছিল। কিন্তু এই সময়ছোৱাৰ ভিতৰতে তেওঁৰ নীতি আৰু উপদেষ্টা ইলন মাস্কৰ কাৰ্যকলাপৰ বিৰুদ্ধে ৰাজপথত নামি পৰিছে আমেৰিকাৰ সচেতন জনতা। শনিবাৰৰ পৰা দেশজুৰি প্ৰতিবাদৰ ঢৌ উঠিছে। এই আন্দোলনত জনতাৰ সৈতে কান্ধত কান্ধ মিলাই থিয় দিছে প্ৰাক্তন উপ-ৰাষ্ট্ৰপতি কমলা হেৰিছে।
তেওঁ আন্দোলনত আংশগ্ৰহণ কৰি কয় যে আজি আমেৰিকাৰ প্ৰতিটো চুকত মানুহে ট্ৰাম্পৰ বিৰুদ্ধে থিয় দিছে। সামাজিক সুৰক্ষা, স্বাস্থ্যসেৱা আৰু শিক্ষাৰ হকে থিয় দিয়াৰ বাবে গৌৰৱান্বিত বুলি মত প্ৰকাশ কৰে।
ট্ৰাম্পৰ শাসনত হতাশ হৈ হাজাৰ হাজাৰ আমেৰিকান নাগৰিকে ৰাস্তাত নামিছে। শনিবাৰৰ পৰা আমেৰিকাৰ নিউয়ৰ্ক, ক’লৰাডো, লছ এঞ্জেলছ, হিউষ্টন আৰু ৱাশ্বিংটনসহ কেইবাখনো চহৰত উত্তাল প্ৰতিবাদ চলি আছে। বিভিন্ন নাগৰিক অধিকাৰ সংগঠন, ট্ৰেড ইউনিয়ন, তৃতীয় লিংগসকলৰ সংগঠন আৰু ৰাজনৈতিক আন্দোলনৰ কৰ্মীসকল একলগ হৈ ৫০খন ৰাজ্যৰ ১২০০তকৈ অধিক স্থানত একেলগে এই ‘হেণ্ডছ অফ’ প্ৰতিবাদী কাৰ্যসূচী হাতত লৈছে। এই সমাৱেশবোৰ শান্তিপূৰ্ণ হৈ আছে, আৰু এতিয়ালৈকে কোনো গ্ৰেপ্তাৰৰ খবৰ অহা নাই।
প্ৰতিবাদীসকলে হুংকাৰ দি কয় যে আমেৰিকাত ৰজা নাই, ফেচিবাদ চলিব নোৱাৰে। এই প্ৰতিবাদ আমেৰিকাতে সীমাবদ্ধ নেথাকি ব্ৰিটেইন, ফ্ৰান্স, জাৰ্মানী, মেক্সিকো আদি দেশলৈও বিয়পি পৰিছে।
উল্লেখ্য যে ট্ৰাম্পৰ ৰাষ্ট্ৰপতি হোৱাৰ পিছৰে পৰা তেওঁৰ কেইবাটাও সিদ্ধান্তই জনতাৰ অসন্তুষ্ট হৈ পৰিছিল। প্ৰশাসনত বিষয়াসকলৰ অব্যাহতিঅনুপ্ৰৱেশকাৰীক বিতাড়ন, তৃতীয় লিংগৰ স্বীকৃতি বাতিল কৰা আৰু নতুন শুল্ক নীতিৰ দৰে পদক্ষেপৰ বিৰুদ্ধে জনসাধাৰণ ক্ষুব্ধ হৈ পৰিছে আমেৰিকাৰ জনতা। বিশেষকৈ ট্ৰাম্প প্ৰশাসনৰ শেহতীয়া শুল্ক নীতিৰ বাবে দেশৰ বাহিৰতো অসন্তোষ বাঢ়িছে।
এই আন্দোলনৰ মাজতো ট্ৰাম্পৰ সমৰ্থকসকল থিয় দিছে। কিন্তু ‘হেণ্ডছ অফ’ আন্দোলনে স্পষ্ট কৰি দিছে যে আমেৰিকাৰ এটা বৃহৎ অংশ তেওঁৰ শাসনত সুখী নহয়। এই ‘হেণ্ডছ অফ’ আন্দোলনে কি ৰূপ ল’ব সেয়া লক্ষণীয় হ’ব।
