শিৱসাগৰ জিলা সমাজ কল্যাণ বিভাগে দেশজুৰি উদযাপিত মাতৃ বন্দনা সপ্তাহ উপলক্ষে শনিবাৰে স্বাস্থ্য, খাদ্য, পুষ্টি আৰু স্বচ্ছতা বিষয়ক এক আলোচনা চক্ৰ অনুষ্ঠিত কৰে।
শিৱসাগৰ ছোৱালী মহাবিদ্যালয়ত অনুষ্ঠিত আলোচনা চক্ৰখনত জিলাখনৰ শিশু উন্নয়ন প্ৰকল্প বিষয়া, মুখ্য সেৱিকা, অংগনৱাড়ী আৰু আশা কৰ্মীসকল উপস্থিত থাকে৷
আলোচনা চক্ৰৰ সমল ব্যক্তি জিলা জনস্বাস্থ্য আৰু কাৰিকৰী বিভাগৰ স্বচ্ছতাৰ নডেল বিষয়া ৰাজীৱ বৰপূজাৰীয়ে অনাময় ব্যৱস্থাৰ উপকাৰিতাৰ বিষয়ে বিতংকৈ উল্লেখ কৰে।
তেওঁ কয়, “অনাময় ব্যৱস্থা ভাল নহ’লে হাইজা, গ্ৰহণী, জন্দিচ আদি সংক্ৰামক ৰোগ বৃদ্ধি হয়।” সুস্বাস্থ্যৰ বাবে বিশুদ্ধ খোৱা পানী ব্যৱহাৰৰ ওপৰত তেওঁ গুৰুত্ব আৰোপ কৰে৷
তেওঁ সন্তানকো পৰিস্কাৰ-পৰিচ্ছন্নতাৰ বিষয়ে শিকোৱাৰ বাবে উপস্থিত মাতৃসকলক আহ্বান জনায়৷
স্বাস্থ্য বিভাগৰ যুটীয়া সঞ্চালক ডা: শ্যাম মাধৱ শৰ্মায়ো স্বাস্থ্য, খাদ্য আৰু পুষ্টি সন্দৰ্ভত ল’বলগীয়া ব্যৱস্থা সন্দৰ্ভত বক্তব্য প্ৰদান কৰে৷
আলোচনা চক্ৰখনত অৱসৰপ্ৰাপ্ত জিলা সমাজ কল্যাণ বিষয়া দীপালী স্বৰ্গীয়াৰী, শিৱসাগৰ ছোৱালী মহাবিদ্যালয়ৰ গৃহ বিজ্ঞান বিভাগৰ মুৰব্বী অধ্যাপিকা ৰীতা বৰকটকী, অতিৰিক্ত মুখ্য স্বাস্থ্য বিষয়া আৰু জিলা সমাজ কল্যাণ বিষয়া দীপালী দেৱীয়েও বক্তব্য ৰাখে৷
শিৱসাগৰ জিলা প্ৰশাসনে অনুষ্ঠানটোত সহযোগিতা আগবঢ়ায়।
যোৱা ২ ডিচেম্বৰৰ পৰা অহা ৮ ডিচেম্বৰলৈ সমগ্ৰ দেশতে মাতৃ বন্দনা সপ্তাহ উদযাপন কৰা হৈছে।
