ভাৰত আৰু নিউজিলেণ্ডৰ মাজৰ তিনিখন এদিনীয়া খেলৰ ছিৰিজত আজি হেমিল্টনত চলি থকা প্ৰথমখন এদিনীয়াত ভাৰতীয় এদিনীয়া দলত অভিষেক ঘটিছে দুই যুৱ অপেনাৰ মায়ংক আগৰাৱাল আৰু পৃথ্বী শ্বৰ।
বাতৰি যুগুতোৱালৈ মায়ংকে ২৮ ৰান আৰু পৃথ্বী শ্বই ২০ ৰান কৰি আউট হয়। প্ৰাৰম্ভিক যুটিত দুয়ো দলৰ হৈ ৫০ ৰান সংগ্ৰহ কৰে।
উল্লেখযোগ্য যে, ভাৰতীয় দলৰ দুই নিয়মীয়া অপেনাৰ ৰোহিত শৰ্মা আৰু শিখৰ ধাৱান আঘাতপ্ৰাপ্ত হোৱা বাবে দল নিৰ্বাচকে মায়ংক আগৰৱাল আৰু পৃথ্বী শ্বক ভাৰতীয় দলত স্থান দিছিল।
শিখৰ ধাৱান অষ্ট্ৰেলিয়াৰ বিৰুদ্ধে ঘৰুৱা শৃংখলাৰ সময়তে কান্ধত আঘাত পোৱাৰ বিপৰীতে ৰোহিত নিউজিলেণ্ডৰ বিৰুদ্ধে খেলা পঞ্চমখন টি-২০ খেলত আঘাতপ্ৰাপ্ত হৈছিল।
পৃথ্বী শ্ব আৰু মায়াংক আগৰৱালে ইয়াৰ পূৰ্বে ভাৰতীয় টেষ্ট দলৰ হৈ খেলিছে যদিও আজি প্ৰথম বাৰৰ বাবে এদিনীয়া আন্তঃৰাষ্ট্ৰীয় খেলত অংশ লৈছে।
পৃথ্বী শ্বই ৱেষ্ট ইণ্ডিজৰ বিৰুদ্ধে টেষ্টত ভাৰতৰ হৈ অভিষেক কৰিছিল আৰু ইয়াৰ পাছতে অষ্ট্ৰেলিয়া ভ্ৰমণলৈ যোৱাৰ সময়ত আঘাতপ্ৰাপ্ত হৈছিল।
আঘাতৰ পাছত ডপিঙৰ বাবে এবছৰলৈ নিষিদ্ধ হৈছিল শ্ব।
নিষেধাজ্ঞা শেষ হোৱাৰ পাছতে ভাৰত-এ দল আৰু মুম্বাই ৰঞ্জি দলৰ হৈ দুৰন্ত প্ৰত্যাৱৰ্তন ঘটাইছিল শ্বই যাৰ সুবাদত তেওঁ জাতীয় দললৈ আমন্ত্ৰণ লাভ কৰে।
