সংবাদ মাধ্যমে বৰ্জন কৰিছে ভাৰত জোড়ো যাত্ৰা, কৰা নাই কাৰ্যসূচীৰ সম্প্ৰচাৰ! অভিযোগ অশোক গেহলটৰ
দেশৰ চতুৰ্থ স্তম্ভ খ্যাত সংবাদ মাধ্যমৰ নিৰপেক্ষতা সন্দৰ্ভত বিগত সময়চোৱাত সচেতন মহলে আঙুলি উঠোৱাৰ সময়তে এইবাৰ ৰাজস্থানৰ মুখ্যমন্ত্ৰী তথা জেষ্ঠ কংগ্ৰেছ নেতা অশোক গেহলটে আজি আন এক অভিযোগ উত্থাপন কৰিছে।
ৰাহুল গান্ধীৰ নেতৃত্বত চলি থকা ভাৰত জোড়ো যাত্ৰাই আজি ৰাজস্থানত প্ৰৱেশ কৰাৰ সময়ত সংবাদ মাধ্যমে বৰ্জন কৰাৰ অভিযোগ উত্থাপন কৰিছে ৰাজ্যখনৰ মুখ্যমন্ত্ৰী গেহলটে।
সাংবাদিকৰ আগত গেহলটে কয় যে যাত্ৰাৰ এই কাৰ্যসূচী দেখুওৱাটো সংবাদ মাধ্যমৰ কৰ্তব্য। ‘ৰাহুল গান্ধীৰ এই যাত্ৰা আৰু চিন্তা ইতিবাচক। ইয়াত কোনো হিংসা নাই। যদি আপোনালোকে এনে যাত্ৰা দেখুৱাব নোৱাৰে, তেন্তে আপোনালোক জাতিৰ প্ৰতি থকা কৰ্তব্যত ব্যৰ্থ হৈছে।”- গেহলটে কয়।
সংবাদ মাধ্যমে এই পদযাত্ৰা বৰ্জন কৰাৰ অভিযোগ উত্থাপন কৰিলেও গেহলটে অৱশ্যে সংবাদদাতা সকলৰ এই ক্ষেত্ৰত কোনো দোষ নাই বুলি উল্লেখকৰে। তেওঁ কয় যে সংবাদদাতা সকলে যাত্ৰাৰ সবিশেষ তথ্য সংগ্ৰহ কৰি পঠালেও সংবাদ মাধ্যমৰ জ্যেষ্ঠ বিষয়াসকলে এই পদযাত্ৰা সম্প্ৰচাৰ কৰিব নিবিচাৰে।
তেওঁ কয়, ‘আপোনালোকে সবিশেষ তথ্য আগবঢ়াই দিয়ে। কিন্তু যিসকলে কভাৰেজ ব্লক কৰিবলৈ চেষ্টা কৰিছে তেওঁলোকক সুধিব বিচাৰিছো, এনে এক বৃহৎ কাৰ্যসূচী দেখুৱাব নোৱাৰিবনে? সংবাদ মাধ্যম দেশৰ চতুৰ্থ স্তম্ভ।”
তেওঁ লগতে সংবাদ মাধ্যমৰ এনে পক্ষপাতমূলক কাৰ্যৰ বাবে ইতিহাসে কেতিয়াও ক্ষমা নকৰিব বুলি ক্ষোভ প্ৰকাশ কৰে। লগতে সংবাদ মাধ্যমৰ প্ৰকৃত কৰ্তব্যক ধেমালিৰ দৰে কৰি পেলোৱা হৈছে বুলি মন্তব্য কৰে গেহলটে।
উল্লেখ্য যে, যোৱা ৭ ছেপ্টেম্বৰৰ পৰা কন্যাকুমাৰীত আৰম্ভ হোৱা প্ৰায় ৩,৫৭০ কিলোমিটাৰ দৈৰ্ঘ্যৰ ভাৰত জোড়ো যাত্ৰাই এতিয়ালৈকে গুজৰাট, মহাৰাষ্ট্ৰ, কৰ্ণাটককে ধৰি ৭ খন ৰাজ্য সামৰি লৈছে।
জম্মু-কাশ্মীৰত কংগ্ৰেছৰ এই অভিলাসী কাৰ্যসূচীৰ সামৰণি পৰিব। শাসনাধিষ্ঠ ভাৰতীয় জনতা পাৰ্টিয়ে বিভাজনৰ ৰাজনীতি কৰাৰ অভিযোগ তুলি দলটোৰ এই ৰাজনীতিক প্ৰতিহত কৰাৰ লক্ষ্যৰে এই পদযাত্ৰা কৰা হৈছে বুলি কংগ্ৰেছে ইতিপূৰ্বে স্পষ্ট কৰি দিছে।