‘’মোক বিজেপিৰ প্ৰশান্ত গোস্বামীয়ে whatsapp message ৰ জৰিয়তে প্ৰাথমিক সদস্য পদৰ পৰা বহিস্কাৰ কৰাৰ জাননী দিছে। দলৰ নীতি নিৰ্দেশনা মানি চলা মানুহ হিচাপে কেৱল whatsapp message ৰে বহিস্কাৰ কৰা কথাটো মানি ল’ব নোৱাৰো। কথাটো পুনৰ বিবেচনাৰ বাবে ৰাজ্যিক সভাপতিক আহ্বান জনাম,‘’-বৃহস্পতিবাৰে দিচপুৰ প্ৰেছ ক্লাৱত এখন সংবাদমেলত এইদৰে কয় সদ্য বহিস্কৃত বিজেপি নেত্ৰী মীৰা বৰঠাকুৰে।
বৰঠাকুৰে তেওঁৰ বহিস্কাৰ সম্পৰ্কত নিজৰ বক্তৱ্য ৰখাৰ সময়ত কয় যে জাননী দিলেও মেইলযোগে বা হাতেৰে পোৱাকৈ দিব লাগে।
তাৎপৰ্যপূৰ্ভাৱে বৰঠাকুৰে সদৰী কৰে যে নাগৰিকত্ব সংশোধনী বিধেয়কৰ বিৰোধিতা কৰাৰ বাবে যদি দলে এই শাস্তিমূলক সিদ্ধান্ত লৈছে তেন্তে মই ১০০ বাৰ শাস্তি মূৰ পাতি ল’বলৈ প্ৰস্তুত আছো।
তেওঁ কয়, ‘’বিজেপি দলক ভাল পাওঁ, শ্ৰদ্ধা কৰো। অটল বিহাৰী বাজপেয়ী আৰু লাল কৃষ্ণ আদৱানিৰ আদৰ্শ লৈ বিজেপিত আহিছো। ৰাজনীতি মোৰ পেছা নহয়, অন্তিম দিনটোলৈকে ৰাইজৰ হকে কাম কৰি যাম। বিজেপিৰ বেনাৰখনেই মীৰা বৰঠাকুৰক মীৰা বৰঠাকুৰ বনাইছে।‘’
বৰঠাকুৰে আজি ইয়াৰ মাজতে কিছু আক্ৰমণাত্মকভাৱে দলৰ নেতৃত্বক উভতি ধৰি কয়, ‘’ৰাজেন গোহাঁইৰ বিৰুদ্ধে ধৰ্ষণৰ অভিযোগ উঠাৰ লগতে ভিডিঅ’ও ফাদিল হ’ল। কিন্তু কোনো ব্যৱস্থা নল’লে আৰু বিজেপিৰ স্বাভিমানতো নালাগিল। কিন্তু নাগৰিকত্ব সংশোধনী বিধেয়কৰ বিৰোধিতা কৰোতে বিজেপিৰ স্বাভিমানত লাগিল।‘’
তেওঁ লগতে কয়, ‘’নাগৰিকত্ব সংশোধনী বিধেয়কৰ বিৰুদ্ধে বিজেপিৰ ১০ হাজাৰ মানুহে চহী কৰিছে।‘’
আনহাতে, ইৰ্ষাপৰায়ন আৰু নিজৰ ভৰিৰ তলৰ মাটিকনো নথকাসকলে মোৰ বিৰুদ্ধে এনেকুৱা ষড়যন্ত্ৰত লিপ্ত হৈছে বুলি অভিযোগ কৰি বৰঠাকুৰে আক্ষেপেৰ কয়, ‘’যোৱা ৭ বছৰত বহু প্ৰশ্নৰ উত্তৰ বিচাৰি সৰ্বানন্দ সোণোৱাললৈ পত্ৰ প্ৰেৰণ কৰিছিলো, কিন্তু একোৱেই উত্তৰ নাপালো।‘’
ইপিনে, ‘’হুৰমূৰকৈ এটি সিদ্ধান্ত লৈ মোক বহিস্কাৰ কৰি ৰঞ্জিত দাসে বিজেপিৰ দলীয় সংবিধানখন অৱমাননা কৰিছে,’’ বুলি অভিযোগ কৰি বৰঠাকুৰে কয় যে নৈতিকতা ৰক্ষা কৰি দেহৰ শেষটোপাল তেজ থকালৈকে দলৰ হৈ কাম কৰি যাম।
বৰঠাকুৰে লগতে কয়, ‘’আগন্তুক নিৰ্বাচন আহি আছে, গতিকে দলটোৰ বিনষ্ট হোৱাটো মই নিবিচাৰো।‘’
‘’ডেটিং আৰু ছেটিং কৰি দলত থকা মানুহ মই নহয়,’’ বুলি বিস্ফোৰক মন্তৱ্য কৰি মীৰা বৰঠাকুৰে উল্লেখ কৰে, ‘’ৰাজেন গোহাঁইৰ বিৰুদ্ধে ব্যৱস্থা গ্ৰহণৰ বাবেও আহ্বান জনাই প্ৰধান মন্ত্ৰীলৈ চিঠি লিখিছিলো। সেই বাবেও মোক বহিস্কাৰ কৰা বুলি মোৰ অনুভৱ হয়।‘’
