ৰঞ্জি ট্ৰফী মেচত ইতিহাস গঢ়িলে মেঘালয়ী ক্ৰিকেটাৰে
ৰঞ্জি ট্ৰফী ক্ৰিকেটত মেঘালয়ৰ বেটছমেন দিপ্পু চাংমাই শতকীয় ইনিংছেৰে গঢ়িবলৈ সক্ষম হৈছে এক অনবদ্য ৰেকৰ্ড। ৰঞ্জি ট্ৰফী ক্ৰিকেটত শতক অৰ্জন কৰা তেওঁ প্ৰথম মেঘালয়ী বেটছমেনৰ কৃতিত্ব অৰ্জন কৰে।
দেওবাৰে মিজোৰামৰ বিৰুদ্ধে খেলা মেচখনত দিপ্পুৱে ১১৪ ৰানৰ এক দৰ্শনীয় ইনিংছ খেলে।
মেঘালয়ী ক্ৰিকেটাৰ গৰাকীৰ এই সাফল্যৰ পিছতে দেওবাৰে ৰাজ্যখনৰ মুখ্য মন্ত্ৰী কনৰাড চাংমাই তেওঁক টুইটযোগে শুভকামনা জ্ঞাপন কৰে।
টুইটোত তেওঁ লিখে, ‘দিপ্পু চাংমাই তাৰকীয় ইনিংছ খেলিছে, যিটো মেঘালয় ক্ৰিকেট দলৰ বাবে ঐতিহাসিক। ৰঞ্জি ট্ৰফীত মেঘালয়ী ক্ৰিকেটাৰৰ এইটো প্ৰথম শতক। এই ছিজনটোত আমাৰ ক্ৰিকেটাৰসকলে ভাল প্ৰদৰ্শন কৰি আছে। দললৈ মোৰ শুভেচ্ছা থাকিল’।
A stellar performance by Dipu Sangma who makes history for our Meghalaya Cricket Team as the highest scorer and first century scorer from Meghalaya in the #RanjiTrophy. Our boys are playing wonderfully this season. My best wishes to the Team!
— Conrad Sangma (@SangmaConrad) January 12, 2020
দিপ্পু চাংমাৰ উপৰি প্ৰফেশ্যনেল ক্ৰিকেটাৰ দ্বাৰকা ৰবি তেজাৰ ১০৭ আৰু সঞ্জয় যাদৱৰ ১১৯ ৰানৰ সহায়ত মেঘালয়ে মেচৰ প্ৰথম দিনটোতে এক শক্তিশালী স্থিতিত উপনীত হয়।
উল্লেখ্য যে চলিত ছিজনৰে সদ্য সমাপ্ত চৈয়দ মুস্তাক আলী টি-২০ প্ৰতিযোগিতাত মেঘালয় দলে অসমৰ লগতে ঘৰুৱা ক্ৰিকেটৰ শক্তিশালী দল হিচাপে পৰিচিত মুম্বাইক পৰাস্ত কৰি ক্ৰিকেট বিশেষজ্ঞৰ দৃষ্টি কাঢ়িবলৈ সক্ষম হৈছিল।