ৰঞ্জী ট্ৰফীৰ বিগত খেলত উত্তৰাখণ্ডৰ বিৰুদ্ধে চমকপ্ৰদ বিজয় সাব্যস্ত কৰি উজ্জীৱিত হৈ থকা অসম দলে বৰ্ষাপাৰা ক্ৰিকেট ষ্টেডিয়ামত চত্তিছগড়ৰ বিৰুদ্ধে চলি চকা এলিট গ্ৰুপ-চিৰ এখন খেলত প্ৰথম ইনিংছত গুৰুত্বপূৰ্ণ অগ্ৰগতিৰে ৩ পইণ্ট নিশ্চিত কৰিছে।
বৰ্ষাপাৰা ক্ৰিকেট ষ্টেডিয়ামত ১১ জানুৱাৰিৰ পৰা অনুষ্ঠিত হোৱা খেলখনত অসমে টছত জয়ী হৈ প্ৰথমে বলিং কৰাৰ সিদ্ধান্ত গ্ৰহণ কৰে।
আলহী দল চত্তিছগড়ে প্ৰথম ইনিংছত আটাইকেইটা উইকেট হেৰুৱাই ৩১৮ ৰান সংগ্ৰহ কৰে। চত্তিছগড়ৰ হৈ অমনদ্বীপ খাৰে দৰ্শনীয় শতকীয় (১০৫) ইনিংছ খেলাৰ লগতে অধিনায়ক হৰপ্ৰীত সিঙে ৫০ আৰু শশাংক সিঙে ৭১ ৰানৰ বৰঙনি যোগায়।
আনহাতে, অসমৰ হৈ বলিঙত বেগী বলাৰ অৰূপ দাসে তিনিটা, ৰঞ্জীত মালীয়ে চাৰিটা আৰু ৰিয়ান পৰাগে তিনিটা উইকেট দখল কৰে।
চত্তিছগড়ৰ প্ৰথম ইনিংছৰ ৩১৮ ৰানৰ প্ৰতুত্তৰত অসমে নিজৰ প্ৰথম ইনিংছত বাতৰি যুগুত কৰালৈ ৯ টা উইকেট হেৰুৱাই ৪৬৪ ৰান সংগ্ৰহ কৰিবলৈ সক্ষম হৈছে।
অসমৰ হৈ অধিনায়ক গকুল শৰ্মাই ১২৯ ৰাণৰ এক চমকপ্ৰদ ইনিংছ উপহাৰ দিয়াৰ উপৰিও দুৰ্ভাগ্যজনকভাৱে মাত্ৰ ১ ৰানৰ বাবে শতকৰ পৰা বঞ্চিত হয় ঋষভ দাস।
তদুপৰি, যুৱ ক্ৰিকেটাৰ ৰিয়ান পৰাগে ৬০ ৰান আৰু হাচিল জৈনে ৮৮ ৰানৰ বৰঙনি যোগাই দলক শক্তিশালী স্থিতিত উপনীত কৰাত বিশেষ ভূমিকা পালন কৰে।
উল্লেখযোগ্য যে, অসমে বৰ্তমানলৈ খেলা চাৰিখন খেলৰ ভিতৰত এখন খেলত জয়েৰে ১১ পইণ্ট অৰ্জন কৰিছে।