সামুদ্ৰিক ধুমুহা আম্ফানৰ প্ৰভাৱ অসম আৰু মেঘালয়ত বিশেষভাৱে নপৰিলেও অৱশ্যে উত্তৰ পূৱৰ ৰাজ্যসমূহত সঘনাই হৈ থকা বৃষ্টিপাতৰ ফলত বিচ্ছিন্নভাৱে কিছু কিছু অঞ্চলত বানপানী হোৱা পৰিলক্ষিত হৈছে।
অসমৰ বৰপেটা জিলাৰ কিছু অঞ্চলত ভূটানৰ পৰা বৈ পানীয়ে আৰু লখিমপুৰ জিলাত ৰঙানদীৰ বৃদ্ধি হোৱা জলপৃষ্ঠই ঠায়ে ঠায়ে বানৰ ৰূপ লোৱাৰ সমান্তৰালভাৱে চুবুৰীয়া ৰাজ্য মেঘালয়ৰ গাৰো পাহাৰত বানে বিধ্বংসী ৰূপ ধাৰণ কৰা দেখা গৈছে।
সঘনাই হৈ থকা বৃষ্টিপাতৰ ফলত চুবুৰীয়া ৰাজ্যখনৰ গাৰো পাহাৰ জিলাৰ বিভিন্ন অঞ্চল বানত প্লাৱিত হোৱাৰ লগতে বহু লোক এই বানত ক্ষতিগ্ৰস্ত হৈছে।
জিলাখনৰ ৰাখছামগ্ৰে আৰু টিক্ৰিকিলা মহকুমা দুটা বানত বেয়াকৈ ক্ষতিগ্ৰস্ত হৈছে।
নামনিলৈ বৈ অহা বানে সমগ্ৰ অঞ্চল বুৰাই পেলাইছে।
মহকুমা দুটাৰ বন্যাক্ৰান্তই ওখ ঠাইলৈ নিজকে স্থানান্তৰণ কৰিবলৈ বাধ্য হৈছে।
দুই মহকুমা প্ৰশাসন আৰু খণ্ড উন্নয়ন বিভাগৰ বিষয়া কৰ্মচাৰীসকলে বন্যাক্ৰান্তক উদ্ধাৰ কৰাৰ লগতে বিভিন্ন প্ৰকাৰে সহায় কৰি আছে।
সমগ্ৰ গাৰো পাহাৰতে বানক লৈ লোকসকল এই বিধ্বংসী বানকলৈ সন্ত্ৰস্ত হোৱা পৰিলক্ষিত হোৱা দেখা গৈছে।
