বিষয় অতুল : মিমাৰৰ ওপৰত খৰ্গহস্ত অগপ; লতাশিল থানাত তৰিলে গোচৰ
কৃষি মন্ত্ৰী অতুল বৰাৰ ফটো বিকৃতকৰণ কৰাৰ বিৰুদ্ধে লতাশিল থানাত গোচৰ দিয়ে অগপৰ ছাত্ৰ সংগঠন অসম ছাত্ৰ পৰিষদে।
কিছুমান ব্যক্তি তথা ফেচবুক পেইজে যোগ দিৱসৰ দিনা মন্ত্ৰী গৰাকীয়ে ব্যায়াম কৰি থকা সময়ৰ ফটো বিকৃত কৰি নানা ধৰণৰ ৰূপ দি ফেচবুকত ‘ট্ৰল’ কৰা আৰম্ভ কৰে।
আনকি নাৰী গৰ্ভৰ ছবিৰ ভিতৰতো অতুল বৰাৰ ফটো এডিট কৰি লগাই ‘অসভ্যালিৰ চৰম পৰ্য্যায় অতিক্ৰম কৰি নাৰীক অপমান কৰা’ বুলি অভিযোগ তোলে ছাত্ৰ সংগঠনটোৱে।
যাৰ পৰিপ্ৰেক্ষিতত সৰৱ হৈ পৰে ছাত্ৰ সংগঠনটোৰ সভাপতি ত্ৰিনয়ন বৰুৱা।
ভৱিষ্যতে এনেধৰণৰ মিম বনাই অতুল বৰাক হেয় প্ৰতিপন্ন কৰা সহ্য কৰা নহ’ব বুলি হুংকাৰ দিয়াৰ লগতে ফটো বিকৃত কৰাসকলৰ বিৰুদ্ধে বিহিত ব্যৱস্থা ল’বলৈ আৰক্ষীক আহ্বান জনায়।
‘সচেতনতা সৃষ্টিৰ বাবে যোগ কৰি অতুল বৰাই যিখিনি ফটো সামাজিক মাধ্যমত আপলোড কৰিছিল সেইখিনি ফটো বিকৃত কৰা হ’ল। আটাইতকৈ দুখ লাগিল বিভিন্ন বিদ্যালয় বা বিশ্ববিদ্যালয়ৰ ছাত্ৰ-ছাত্ৰীয়ে সেই ফটো শ্বেয়াৰ কৰিলে। তেওঁলোকলৈ অনুৰোধ যাতে এনেদৰে ফটো বিকৃত কৰি ফটো যাতে শ্বেয়াৰ দ্বিতীয়বাৰলৈ নকৰে।‘ ত্ৰিনয়নে এইদৰে কয়।
তেওঁ ফটো বিকৃত কৰাসকলক সকীয়াই কয় ‘যিসকলে ফটো বিকৃতকৰণ কৰিছে সেইসকলৰ বিৰুদ্ধে আইনী ব্যৱস্থা গ্ৰহণ কৰা হ’ব। তেওঁলোকে যাতে পুনৰ মানুহক হাঁহিয়াতৰ পাত্ৰ নকৰে।‘