পাকিস্তানত প্ৰশিক্ষণ লৈ চোৰাংচোৱাগিৰি, ISI লৈ ভাৰতৰ গোপন তথ্য সৰবৰাহ; গ্ৰেপ্তাৰ কাছিম!
ভাৰতীয় সেনাৰ গোপন তথ্য পাকিস্তানৰ চোৰাংচোৱা সংস্থা আই এছ আইক সৰবৰাহ কৰাৰ অভিযোগত দিল্লী আৰক্ষীৰ বিশেষ শাখাই হাৰিয়ানাৰ মেৱাট জিলাৰ এজন লোকক গ্ৰেপ্তাৰ কৰিছে। ধৃত লোকজনৰ নাম কাছিম।
ইতিমধ্যে দুবাৰকৈ তেওঁ পাকিস্তানলৈ গৈ আই এছ আইৰ পৰা পোনপটীয়াকৈ চোৰাংচোৱাগিৰিৰ প্ৰশিক্ষণ লৈ আহিছে বুলি দাবী চোৰাংচোৱাৰ।
কাছিমে আই এছ আইৰ হৈ কাম কৰিছিল। তেওঁ অবৈধভাৱে সীমান্ত পাৰ হৈ পাকিস্তানত প্ৰৱেশ কৰিছিল আৰু তাত প্ৰশিক্ষণ শিবিৰত অংশ লৈছিল।
তাত তেওঁক ভাৰতীয় সেনাক কেনেকৈ নিৰীক্ষণ কৰিব লাগে, সেনা শিবিৰৰ ছবি কেনেকৈ তুলি পঠিয়াব লাগে, ক’ড ভাষা ব্যৱহাৰ কৰি কেনেকৈ যোগাযোগ কৰিব লাগে সেই বিষয়ে শিকাইছিল। তেওঁ অস্ত্ৰ-শস্ত্ৰ আৰু ড্ৰ’ন ব্যৱহাৰৰ প্ৰশিক্ষণো লাভ কৰিছিল।
ভাৰতলৈ উভতি অহাৰ পিছত কাছিমে নিয়মিতভাৱে সেনাবাহিনীৰ স্পৰ্শকাতৰ তথ্য আৰু ছবি মোবাইল ফোনত লৈ আই এছ আইলৈ প্ৰেৰণ কৰিছিল। এই কামৰ বাবে তেওঁৰ বেংক একাউণ্টলৈ বৃহৎ পৰিমাণৰ ধন পঠিওৱা হৈছিল।
আৰক্ষীয়ে দাবী কৰিছে যে কাছিমৰ ভাতৃও আই এছ আইৰ সৈতে জড়িত আৰু বৰ্তমান পলাতক হৈ আছে। দীৰ্ঘদিন ধৰি নিৰীক্ষণত আছিল সমগ্ৰ চক্ৰটো।
কাছিমৰ বিৰুদ্ধে চৰকাৰী গোপনীয়তা আইনৰ অধীনত গোচৰ ৰুজু কৰা হৈছে আৰু জেৰাৰ সময়ত আৰু ব্যাপক চক্ৰৰ সন্ধান উলিয়াবলৈ অভিযান আৰম্ভ কৰা হৈছে।