বোকাখাত মহকুমাৰ বংকোৱালৰ পৰা মৰিয়াহোলা হৈ কাজিৰঙা ৰাষ্ট্ৰীয় উদ্যানৰ কাষৰীয় জাপৰিপথাৰ লৈকে প্ৰসাৰিত মথাউৰিটোৰ নিৰ্মাণ কাৰ্য আজি পৰিদৰ্শন কৰে জল সম্পদ বিভাগৰ মন্ত্ৰী পীয়ুষ হাজৰিকাই ৷
এচিয়ান ডেভিলপমেন্ট বেংকৰ অৰ্থ সাহায্যৰে নিৰ্মাণ কৰি থকা মথাউৰিটোৰ নিৰ্মাণ কাৰ্য পৰিদৰ্শন কৰি মন্ত্ৰী পীয়ুষ হাজৰিকাই আগন্তুক বানপানীৰ সময়ত হ’ব পৰা সমস্যাৰ বিষয়ে স্থানীয় বিষয়া আৰু ঠিকাদাৰৰ সৈতে নিৰ্মাণস্থলীতে মত বিনিময় কৰে ৷
প্ৰায় ৩০০ কোটিটকীয়া এই বিলাসী প্ৰকল্পটোৰ কাম ২০১৯ চনৰে পৰাই চলি আছে ৷
মথাউৰিৰ বাবে মাটি অধিগ্ৰহণ প্ৰক্ৰিয়া, ক্ষতিপূৰণ প্ৰদানত হোৱা সমস্যা, ক্ষতিপুৰণ সন্দৰ্ভত স্থানীয় সংগঠনৰ প্ৰতিবাদ আদিৰ লগতে মথাউৰি নিৰ্মাণৰ বাবে প্ৰয়োজন হোৱা মাটিৰ বাবেও মথাউৰি নিৰ্মাণ কাৰ্যত অহা স্থবিৰতাৰ বুজ লয় মন্ত্ৰী পীয়ুষ হাজৰিকাই ৷
প্ৰকল্পটোৰ বাবে বন বিভাগ আৰু বিভিন্ন বিভাগৰ সৈতে হোৱা আলোচনাত মথাউৰি নিৰ্মাণৰ বাবে প্ৰয়োজনীয় মাটি সমীপৰ কাৰ্বি পাহাৰৰ পৰা অনা অনুমতি দিয়া হৈছিল যদিও সম্প্ৰতি কাৰ্বি আংলং জিলাত হোৱা বন ধ্বংস আৰু পাহাৰ কটা সম্পৰ্কত আৰোপিত নিষেধাজ্ঞাৰ পিচত মাটিৰ নাটনিৰ বাবেও স্থবিৰ হয় এই মথাউৰিৰ নিৰ্মাণ কাৰ্য ৷
আজি নিৰ্মাণস্থলীত হোৱা আলোচনাত জল সম্পদ মন্ত্ৰী পীয়ুষ হাজৰিকাই অচিৰেই কাৰ্বি আংলং জিলাৰ বন বিভাগৰ সৈতে আলোচনা কৰিব বুলি মন্তব্য কৰে আৰু নিৰ্মাণ কাৰ্য ক্ষীপ্ৰ কৰিবৰ বাবে জল সম্পদ বিভাগ আৰু ঠিকাদাৰক নিৰ্দেশ দিয়ে ৷
মন কৰিব লগীয়া যে এচিয়ান ডেভিলপমেন্ট বেংকৰ অৰ্থ সাহায্যৰে নিৰ্মাণ কৰা এই মথাউৰিটোৱে কাজিৰঙা ৰাষ্ট্ৰীয় উদ্যানৰ পুৱ সীমা আৰু ৰাষ্ট্ৰীয় উদ্যানখনৰ তৃতীয় সংযোজনো স্পৰ্শ কৰিছে ৷
পুৰণি মথাউৰিক সম্প্ৰসাৰণ আৰু প্ৰসাৰিত কৰি কাজিৰঙা ৰাষ্ট্ৰীয় উদ্যান জাপৰি পথাৰ আৰু ডিফলু পথাৰৰ কৃষিভূমিক বানৰ পৰা ৰক্ষা কৰাৰ বাবেই এই অভিলাষী প্ৰকল্প হাতত লোৱা হৈছে ৷
বংকোৱালৰ পৰা অহা এই মথাউৰিয়ে জাপৰিপথাৰ হৈ বৰজুৰিত ৩৭ নং ৰাষ্ট্ৰীয় পথত লাগিবগৈ ৷ যাৰ বাবে জাপৰি পথাৰ, ডিফলু পথাৰৰ যাতায়ত উন্নত হোৱাৰ উপৰি চোৰাংচিকাৰ নিয়ন্ত্ৰনত কাজিৰঙাৰ কৰ্তৃপক্ষকো উপকৃত কৰিব ৷
