সাৱধান মহানগৰবাসী! এ টি এম মেচিনত গোপন কেমেৰা স্থাপনেৰে এ টি এম কাৰ্ডৰ তথ্য চুৰ কৰিছে দুৰ্বৃত্তই
গ্ৰাহকৰ এ টি এম কাৰ্ডৰ পিন চুৰ কৰাৰ নতুন কৌশল লৈ গুৱাহাটীত প্ৰৱেশ কৰিছে একাংশ দুৰ্বৃত্ত।
সকলো সতৰ্কতামূলক ব্যৱস্থাক ফাঁকি দি এই দুৰ্বৃত্তই গ্ৰহণ কৰা এটা অভিনৱ কৌশল আজি পোহৰলৈ আনিলে এজন নাগৰিকে।
আজি উক্ত নাগৰিকজনে লাষ্ট গেইটস্থিত হোটেল ৰাজধানী ৰিজেন্সিৰ বিপৰীত ফালে থকা এছ বি আইৰ এটা এ টি এম মেচিনৰৰ পৰা টকা উলিয়াবলৈ কাৰ্ড ইনছাৰ্ট কৰি মনত কিছু সন্দেহ হোৱাত ভালকৈ নিৰীক্ষণ কৰে।
মেচিনত সন্দেহযুক্ত কিবা লাগি থকাৰ সম্ভাৱনা দেখা পাই তেওঁ সংশ্লিষ্ট বেংকটোৰ বিষয়া আৰু আৰক্ষীক খবৰ দিয়ে।
পৰীক্ষা কৰি চোৱাৰ পিছত দেখা যায় যে এ টি এম মেচিনটোত দুৰ্বৃত্তই গ্ৰাহকৰ কাৰ্ডৰ সকলো তথ্য চুৰ কৰিব পৰাকৈ উন্নত প্ৰযুক্তি কৌশলৰ সঁজুলি লগাই থৈছে।
ই গ্ৰাহকৰ পিন নম্বৰ ধৰি ৰাখে কেমেৰাত; কাৰ্ড ৰেণ্ডাৰ আৰু চিপ থকা এই উন্নত সঁজুলিৰ সহায়ত লোৱা তথ্যৰ পৰা কাৰ্ডখনৰ ক্ল’ন কৰা সম্ভৱ; যিটোৰ জৰিয়তে গ্ৰাহকৰ একাউণ্টৰ পৰা টকা উঠাই নিয়া সহজ।
ঘটনাটো পোহৰলৈ অহাৰ পিছতে বেংকৰ বিষয়াসকলে হাতীগাওঁ আৰক্ষীৰ সহায়ত এ টি এম মেচিনটো ছীল্ড কৰি দিছে।
আৰক্ষীয়ে ইতিমধ্যে ইয়াৰ তদন্তৰ দায়িত্ব লৈছে আৰু বেংক কৰ্তৃপক্ষক চি চি টি ভিৰ ফুটেজ বিচাৰিছে।
পূৰ্বেও গুৱাহাটী মহানগৰীত দুৰ্বৃত্তই গ্ৰাহকৰ এ টি এম কাৰ্ড ক্ল’ন কৰি টকা উলিয়াই নিয়াৰ ঘটনা সংঘটিত হৈছিল। কিন্তু আজি ধৰা পৰা কৌশল ইমান ভয়ংকৰ যে ইয়াৰ ফলত বৃহত সংখ্যক গ্ৰাহক প্ৰৱঞ্চিত হোৱাৰ সম্ভাৱনা আছে।
আনহাতে বেংক কৰ্তৃপক্ষই ইয়াৰ এ টি এম কেন্দ্ৰবোৰত স্থাপন কৰা চি চি টি ভিৰ ফুটেজ দৈনিক পৰীক্ষা কৰে নে নকৰে তাত সন্দেহ আহি পৰিছে। দৈনিক পৰীক্ষা কৰাৰ জৰিয়তে এনেকুৱা দুৰ্বৃত্তৰ কাণ্ড ধৰা পৰাটো নিশ্চিত।