এচাম অসাধু চক্ৰই অসমৰ বনাঞ্চলসমূহৰ গছ-বন কাটি সংকুচিত কৰি অহাৰ উপৰি বনাঞ্চলসমূহৰ জীৱ-জন্তুকো হত্যা কৰি নাইকিয়া কৰাৰ সমান্তৰালভাৱে দেওবাৰে নগাঁও জিলাৰ লাওখোৱা অভয়াৰণ্যখনৰ জলাশয়সমূহত থকা মাছবোৰক বিহ ঢালি মাৰি পেলোৱা কাৰ্যই সমগ্ৰ নগাঁও জিলাতে চাঞ্চল্যৰ সৃষ্টি কৰিছে।
উল্লেখ্য যে, এচাম অসাধু চক্ৰই লাওখোৱা অভয়াৰণ্যৰ জলাশয়ত বিষাক্ত দ্ৰব্য ঢলাৰ ফলত হাজাৰ হাজাৰ মৃত মাছ উপঙিছে। আনকি ই জলাশয়টোত পানী খাবলৈ অহা বিভিন্ন পশু-পক্ষীৰ জীৱনলৈ ভাবুকি কঢ়িয়াই আনিছে।
ইতিমধ্যে বন বিভাগৰ লোকে তদন্ত আৰম্ভ কৰি আশিকুৰ ৰহমান আৰ খুৰশেদ আলী নামৰ দুজনক আটক কৰিছে। তাৎপৰ্যপূৰ্ণ বিষয় যে, অভয়াৰণ্যখনত দীৰ্ঘদিন ধৰি এচাম অসাধু চক্ৰই অৱৈধভাৱে মাছ ধৰাৰ লগতে বিভিন্ন পশু পক্ষী নিধন কাৰ্য চলাই আহিছে।
আনকি অভয়াৰন্যখনত গৰু-মহৰ খুঁটি স্থাপন কৰি মূল্যবান গছ কাটি নিগাজীকৈ বসবাসো কৰি আহিছে। এনে কাৰ্যত জড়িত আছে অভয়াৰন্যখনৰ একাংশ বনকৰ্মী। কিন্তু শেহতীয়াকৈ বন বিভাগৰ লোকে অসাধু লোকসকলৰ বিৰুদ্ধে ঘনাই অভিযান চলাই ৰখাত ক্ষুন্ন হৈ পৰিছে অসাধু চক্ৰটো। সেয়ে এই অসাধু চক্ৰই বিহ ঢালি অভয়াৰন্যখনৰ জলাশয়ৰ মাছ নিধন কাৰ্য অব্যাহত ৰাখিছে।
আনহাতে, সময় থাকোতেই যদি অসাধু চক্ৰৰ বিৰুদ্ধে বন বিভাগে কঠোৰ পদক্ষেপ গ্ৰহণ নকৰে তেন্তে অচিৰেই অসমৰ মানচিত্ৰৰ পৰাই লাওখোৱা অভয়াৰণ্যখনৰ অস্তিত্ব নাইকিয়া হৈ পৰিব বুলিও জিলাখনৰ সচেতন মহলে মতপোষণ কৰিছে।
