পথ প্ৰকল্পৰ দুৰ্নীতি ফাদিল হোৱাৰ কেইদিনমান পিছতে উদ্ধাৰ হৈছে এজন যুৱ সাংবাদিকৰ মৃতদেহ। ১ জানুৱাৰীৰ পৰা সন্ধানহীন হৈ আছিল মুকেশ চন্দ্ৰকাৰ নামৰ সাংবাদিকজন। তেওঁৰ ককায়েক যুকেশ চন্দ্ৰকাৰে আৰক্ষীৰ ওচৰত এখন নিৰুদ্দেশ ডায়েৰী দাখিল কৰে।
নিৰুদ্দেশ হোৱাৰ পিছৰে পৰা মুকেশৰ ফোনটো চুইচ অফ হৈ আছিল। ছত্তীশগড়ৰ বিজাপুৰ জিলাত সংঘটিত হৈছে এই ঘটনা। শুকুৰবাৰে আৰক্ষীয়ে এটা টেংকৰ ভিতৰৰ পৰা উদ্ধাৰ কৰে সাংবাদিকগৰাকীৰ মৃতদেহ।
আৰক্ষী আৰু পৰিয়ালৰ সূত্ৰৰ পৰা জানিব পৰা মতে, মুকেশে স্থানীয় নিউজ চেনেল এটাত কাম কৰিছিল। পথ নিৰ্মাণৰ ঠিকাদাৰ সুৰেশ চন্দ্ৰকাৰৰ বিৰুদ্ধে দুৰ্নীতিৰ অভিযোগকলৈ বাতৰি প্ৰকাশ কৰাৰ পিছৰে পৰা ঠিকাদাৰ আৰু তেওঁৰ সাংগোপাংগোসকলে তেওঁৰ সৈতে যোগাযোগ কৰিছিল।
মুকেশে বস্তাৰ জিলাত ১২০ কোটি টকাৰ এটা পথ নিৰ্মাণ প্ৰকল্পৰ দুৰ্নীতিৰ বাতৰি পৰিৱেশন কৰিছিল। তেওঁৰ এই বাতৰিৰ লগে লগে ৰাজ্য চৰকাৰে দুৰ্নীতিৰ তদন্তৰ নিৰ্দেশ দিয়ে। মূলতঃ ঠিকাদাৰৰ বিৰুদ্ধে অনিয়মৰ অভিযোগত তদন্ত আৰম্ভ হৈছিল।
যোৱা ১ জানুৱাৰীৰ নিশাৰ পৰা মুকেশৰ আৰু সন্ধান পোৱা হোৱা নাছিল। সেইদিনা মুকেশৰ ঠিকাদাৰ সুৰেশ চন্দ্ৰকাৰৰ ভায়েক ৰিতেশৰ লগত আলোচনা হোৱাৰ কথা আছিল। সুৰেশৰে এটা ঘাটিত তেওঁলোকৰ দেখা হৈছিল। তেতিয়াৰ পৰাই সাংবাদিকজনৰ ফোনটো চুইচ অফ হৈ আছিল।
নিৰুদ্দেশৰ তথ্য লাভ কৰাৰ পিছত লগে লগে আৰক্ষীয়ে তদন্ত আৰম্ভ কৰে। বিশেষভাৱে গঠন কৰা এটা দলে সম্ভৱপৰ সকলো ঠাইতে মুকেশৰ সন্ধানত নামে।
শুকুৰবাৰে সন্ধিয়া আৰক্ষীয়ে চত্তনপাৰা অঞ্চলৰ ঠিকাদাৰ সুৰেশৰ ঘৰৰ পানীৰ টেংকিৰ পৰা যুৱ সাংবাদিকজনৰ মৃতদেহ উদ্ধাৰ কৰে। এইখিনিতে তেওঁক শেষবাৰৰ বাবে দেখা গৈছিল।
এজন জ্যেষ্ঠ আৰক্ষী বিষয়াই কয়, “আমি চিচিটিভিৰ ফুটেজ আৰু মোবাইল ফোনটোৰ শেষৰ স্থান ব্যৱহাৰ কৰি ঠিকাদাৰৰ ঘৰত তালাচী চলালো। তাতে পানীৰ টেংকিৰ ভিতৰৰ পৰা উদ্ধাৰ হয় মৃতদেহটো।”
আৰক্ষীয়ে লগতে কয় যে ঠিকাদাৰজন পলায়ন কৰিলেও তেওঁৰ ভাতৃক জিম্মাত লোৱা হৈছে। আন কেইবাজনকো সোধা-পোছা কৰা হৈছে।
