কৰ’না ভাইৰাছৰ বাবে স্থাপন কৰা আইছ’লেশ্যন চেন্টাৰক লৈ বিতৰ্কিত মন্তব্য কৰা ধিং সমষ্টিৰ এআইয়ুডিফৰ বিধায়ক আমিনুল ইছলামক মঙলবাৰে ৰাতিপুৱা নগাঁও আৰক্ষীয়ে গ্ৰেপ্তাৰ কৰে।
উল্লেখযোগ্য যে কৰ’নাক লৈ ধিং সমষ্টিৰ এআইয়ুডিএফৰ বিধায়ক আমিনুল ইছলামে ভয়ংকৰ অপপ্ৰচাৰ চলোৱাৰ তথ্য পোহৰলৈ আহিছিল।
কৰ’না ৰোগীৰ বাবে স্থাপন কৰা কোৱাৰেণ্টাইন চেণ্টাৰক ডিটেনশ্যন চেণ্টাৰতকৈও ভয়াবহ বুলি অভিহিত কৰিছিল ইছলামে। তেওঁৰ মন্তব্যই ৰাজ্যখনৰ ইছলামধৰ্মী লোকক বিপথে পৰিচালিত কৰাৰ অভিযোগ উঠিছিল।
বিধায়ক গৰাকীয়ে আনকি মুছলমান লোকসকলক আওপাকে স্বাস্থ্য বিভাগৰ সৈতে সহযোগ নকৰিবলৈ প্ৰৰোচিত কৰিছিল।
অসম আৰক্ষীৰ হাতত পৰে এক বিশেষ অডিঅ’। ভাইৰেল হৈ পৰা বিধায়কজনৰ কণ্ঠ সম্বলিত এই অডিঅ’ ক্লিপটোত বহু আপত্তিজনক তথ্য পোহৰলৈ আহে।
কোৱাৰেণ্টাইন চেণ্টাৰ, চিকিৎসক আৰু স্বাস্থ্যবিভাগৰ প্ৰতি বিদ্বেষ প্ৰকাশ কৰা অডিঅ’তবলিগী জামাতৰ পৰা উভতি অহা লোকসকলক হাৰাশাস্তি কৰা বুলি কোৱা হৈছে।
বিধায়কগৰাকীয়ে আনকি নিজামুদ্দিনৰ পৰা ঘূৰি অহা কৰ’না পজিটিভ পোৱা জাগীৰোডৰ তিনিগৰাকী ৰোগীক স্বাস্থ্য বিভাগে পৰীক্ষা অবিহনে ৰোগী সজোৱাৰো অপপ্ৰচাৰ চলাইছিল ইছলামে।
আনহাতে, সোমবাৰে নিশাৰ পৰা নগাঁও আৰক্ষীৰ অতিথিশালাত বিধায়কগৰাকীক নজৰবন্দী কৰি ৰখা হৈছিল।বিধায়ক গৰাকীৰ ধিঙৰ বাসগৃহত সোমবাৰে নিশা আৰক্ষীৰ এটা দল উপস্থিত হৈ তেওঁক নগাঁৱলৈ লৈ আনিছিল।
