ধিঙৰ বিধায়ক আমিনুল ইছলাম বিজেপিৰ এজেন্ট : গৌৰৱ গগৈ
শেহতীয়াকৈ কাশ্মীৰত পাকিস্তানী উগ্ৰপন্থীৰ হাতত ৪৪ জন জোৱানৰ মৃত্যুক কেন্দ্ৰ কৰি ধিং সমষ্টিৰ বিধায়ক আমিনুল ইছলামে কৰা বিতৰ্কিত মন্তব্যক সাংসদ গৌৰৱ গগৈ, বটদ্ৰৱাৰ প্ৰাক্তন মন্ত্ৰী গৌতম বৰা, স্বৰ্ণকন্যা হিমা দাসৰ লগতে উপস্থিত সকলোৱে তীব্ৰ গৰিহনা দিয়ে। ধিং সমষ্টিৰ বিধায়ক আমিনুল ইছলামক বিজেপিৰ এজেন্ট আখ্যা দিয়ে সাংসদ গৌৰৱ গগৈয়ে।
নগাঁও জিলাৰ ধিঙৰ স্বৰ্ণকন্যা হিমা দাসৰ গাঁও কান্ধুলিমাৰীত আজি এটা অতিথিশালাৰ আধাৰশিলা স্থাপন কৰা অনুষ্ঠানত উপস্থিত আছল সাংসদ গৌৰৱ গগৈ। সংসদ পুঁজিৰ দহ লাখ টকা ব্যয় সাপেক্ষে এই অতিথিশালাটো নিৰ্মাণ হ’ব।
অতিথিশালাটোৰ আধাৰশিলা স্থাপন অনুষ্ঠানক কেন্দ্ৰ কৰি অনুষ্ঠিত হোৱা এখন সভাত সাংসদ গগৈয়ে কয়,‘এই অতিথিশালাই অঞ্চলটোৰ এক দীৰ্ঘদিনীয়া অভাৱ পূৰণ কৰিব।‘ আনহাতে, কাশ্মীৰত নিহত হোৱা বীৰ জোৱানসকলৰ আত্মাৰ সদ্গতি কামনা কৰি সকলোৱে শ্ৰদ্ধাঞ্জলি জনায়।
আধাৰশিলা স্থাপন কৰাৰ পাছতেই সাংসদ গৌৰৱ গগৈ স্বৰ্ণকন্যা হিমা দাসৰ ঘৰত উপস্থিত হৈ হিমাৰ পৰীক্ষাৰ খৱৰ লোৱাৰ লগতে হিমাৰ অনুশীলনৰ বিষয়ে বাৰ্তালাপ কৰে। তাৰ পিছতেই সাংসদগৰাকীয়ে হিমাৰ গাঁও কান্ধুলিমাৰী ৰাজহুৱা নামঘৰত আঠু লৈ সেৱা লয়।
সাংসদগৰাকীৰ এই সমূহ কাৰ্যসূচীত উপস্থিত থাকে বটদ্ৰৱা সমষ্টিৰ প্ৰাক্তন বিধায়ক তথা মন্ত্ৰী গৌতম বৰা।