দৰং জিলাৰ মঙলদৈত অনুষ্ঠিত হোৱা প্ৰথম সংখ্যক অনুপম দাস সোঁৱৰণি সদৌ অসম টি-২০ ক্ৰিকেট টুৰ্নামেণ্টত ছুপাৰনোভা ক্লাবে পোষ্টেল ক্লাবক ২৪ ৰানত পৰাস্ত কৰি চেম্পিয়নৰ খিতাপ অৰ্জন কৰে।
মঙলদৈ ষ্টেডিয়ামত অনুষ্ঠিত হোৱা ফাইনেল মেচখনত ছুপাৰনোভা ক্লাবে টছত জয়ী হৈ প্ৰথম বেটিং কৰি নিৰ্ধাৰিত ২০ অ’ভাৰত ৯ উইকেট হেৰুৱাই ১১০ ৰান সংগ্ৰহ কৰিবলৈ সক্ষম হয়।
ছুপাৰনোভা ক্লাবৰ হৈ কুনাল শইকীয়াই সৰ্বাধিক ৩৬ আৰু বিশাল ৰয়ে ৩৩ ৰানৰ গুৰুত্বপূৰ্ণ বৰঙনি আগবঢ়ায়। ইফালে পোষ্টেলৰ হৈ চানক্য শৰ্মাই ১০ ৰান খৰছ কৰি ২টা, বিতপ মহন্তই ১৯ ৰানৰ বিনিময়ত ২টা আৰু সিদ্ধাৰ্থ শৰ্মাই ২০ ৰান খৰছ কৰি ২টা উইকেট লাভ কৰে।
ইফালে ১১১ ৰানৰ লক্ষ্য আগত লৈ বেটিং কৰিবলৈ আহি পোষ্টেল ক্লাবে ৮৬ ৰানতে নিজৰ ইনিংছ সামৰি মেচখনত পৰাজয় স্বীকাৰ কৰে। ছুপাৰনোভাৰ এই বিজয়ৰ মূলতে আছিল সিদ্ধাৰ্থ শংকৰ বৰুৱাৰ আকৰ্ষণীয় বলিং। তেওঁ ১০ ৰানৰ বিনিময়ত ৩টা উইকেট লাভ কৰে। তেওঁৰ উপৰি কল্যাণ গগৈয়ে ২টা আৰু ৱাছিম আহমেদে ১টা উইকেট লাভ কৰে।
পোষ্টেলৰ হৈ একমাত্ৰ দীপ্তেশ সাহা (২৭) আৰু ৰোশন বাস্ফৰেহে সামান্য পৰিমানে ছুপাৰনোভাৰ বলাৰক প্ৰত্যাহ্বান জনাবলৈ সক্ষম হয়।
ছুপাৰনোভা ক্লাবৰ হৈ দেখুওৱা উজ্জীৱিত প্ৰদৰ্শনৰ বাবেই সিদ্ধাৰ্থ শংকৰ বৰুৱাক মেচখনৰ শ্ৰেষ্ঠ খেলুৱৈ হিচাপে বিবেচিত কৰা হয়। ফাইনেলৰ অন্তত হোৱা বঁটা বিতৰণী অনুষ্ঠানত মুখ্য মন্ত্ৰীৰ আইন উপদেষ্টা শান্তনু ভৰালীৰ উপৰি আন বহু গণ্য মান্য ব্যক্তিয়ে অংশগ্ৰহণ কৰে।
