মিজোৰামৰ স্থানীয় নিৰ্বাচনত মিজো নেশ্যনেল ফ্ৰণ্ট (এম এন এফ) সংখ্যাগৰিষ্ঠতা অৰ্জনেৰে ৩২৪ খন গাঁও পঞ্চায়ত আৰু ২৬২ ৱাৰ্ডত বিজয় সাব্যস্ত কৰে।
বিগত ২৭ আগষ্টত ৰাজ্যখনৰ ৫৫০ খন গাঁও পঞ্চায়ত আৰু ৫৯ টা স্থানীয় পৰিষদৰ নিৰ্বাচন অনুষ্ঠিত হৈছিল।
নিৰ্বাচনৰ সময়ত স্বাস্থ্য বিভাগে বান্ধি দিয়া সকলো ধৰণৰ নীতি-নিৰ্দেশনা মানি চলা হৈছিল।
ইয়াৰ পূৰ্বে এম এন এফে বাৰখন গাঁও পঞ্চায়তত বিনা প্ৰতিদ্বিন্দ্বিতাই বিজয় সাব্যস্ত কৰিছিল।
মিজোৰাম ৰাজ্যিক নিৰ্বাচন আয়োগে উল্লেখ কৰা অনুসৰি, এম এন এফে ৫৮.৯১ শতাংশ গাঁও পঞ্চায়ত আৰু ৮৪.৭৫ শতাংশ স্থানীয় পৰিষদত বিজয় সাব্যস্ত কৰিছে।
আনহাতে, মুখ্য বিৰোধী দল কংগ্ৰেছে ১৭.৪৫ শতাংশ ভোট লাভেৰে মাত্ৰ ৯৬ খন গাঁও পঞ্চায়তহে দখল কৰিবলৈ সক্ষম হয়।
তদুপৰি, বিগত বৰ্ষত গঠন হোৱা জোৰাম পিপ’লছ মুভমেণ্টে (জেদ পি এম) প্ৰথমবাৰৰ বাবে নিৰ্বাচনত অৱতীৰ্ণ হৈ ৬.৯১ শতাংশ ভোট লাভেৰে ৩৮ খন গাঁও পঞ্চায়ত দখল কৰিবলৈ সক্ষম হয়।
মিজোৰামৰ ৪০ জনীয়া সদস্য থকা বিধানসভাত বিধায়ক থকা ভাৰতীয় জনতা পাৰ্টিয়ে নিৰ্বাচনত অৱতীৰ্ণ হৈছিল যদিও কোনো এগৰাকী সদস্যই জয়লাভ কৰিবলৈ সক্ষম নহ’ল।
