ৰাহুল গান্ধীৰ এক সাক্ষাৎকাৰে জোকাৰণি তুলিছে দেশৰ ৰাজনীতিত। লগতে কঁপনি তুলিছে শাসকীয় বিজেপিৰ অন্তৰ্ভাগত। উল্লেখ্য যে নিৰ্বাচনৰ ফলাফল ঘোষণাৰ পাছতে ৰাহুল গান্ধীয়ে এক সংবাদ পত্ৰত সাক্ষাৎকাৰ দিয়ে। উক্ত সাক্ষাৎকাৰতত ৰাহুল গান্ধীয়ে প্ৰধানমন্ত্ৰী মোদীৰ তৃতীয়খন চৰকাৰখন চলি থাকিবলৈ যথেষ্ট সংগ্ৰাম কৰিব লাগিব বুলি ভৱিষ্যদ্বাণী কৰে।
ভাৰতীয় ৰাজনৈতিক পৰিবেশত ৰাজনৈতিক কৌশলৰ পৰিৱৰ্তন হৈছে আৰু প্ৰধানমন্ত্ৰী নৰেন্দ্ৰ মোদীৰ চৰকাৰে জীয়াই থাকিবলৈ সংগ্ৰাম কৰিব বুলি দাবী কৰিছে বিৰোধী নেতা ৰাহুল গান্ধীয়ে।
২০১৪ চনত মোদীয়ে ক্ষমতা দখল কৰাৰ পাছত প্ৰথমবাৰৰ বাবে শাসকীয় ভাৰতীয় জনতা পাৰ্টিয়ে এইবাৰ নিৰ্বাচনত সংখ্যাগৰিষ্ঠতা হেৰুৱাইছে। ফাইনেন্সিয়েল টাইমছক দিয়া প্ৰথম সাক্ষাৎকাৰত গান্ধীয়ে কয়, ‘ভাৰতীয় ৰাজনীতিত পৰিৱৰ্তন ঘটিছে।
যোৱা সপ্তাহত মোদীয়ে শপত গ্ৰহণ কৰি জৱাহৰলাল নেহৰুৰ পাছত একেৰাহে তৃতীয়বাৰৰ বাবে ভাৰতৰ প্ৰথমগৰাকী প্ৰধানমন্ত্ৰী হিচাপে পৰিগণিত হয়। কিন্তু ভাৰতীয় ৰাজনৈতিক বিশ্লেষকসকলে তেওঁৰ মিত্ৰজোঁটৰ স্থিতিশীলতাক লৈ প্ৰশ্ন উত্থাপন কৰিছে। আনকি মোদীৰ তৃতীয়খন চৰকাৰ যোৱা এটা দশকৰ ভিতৰত আটাইতকৈ দুৰ্বল চৰকাৰ হ’ব বুলিও কোৱা হৈছে। কাৰণ বিজেপিয়ে ক্ষমতাত তিষ্ঠি থাকিবলৈ সৰু সৰু মিত্ৰ দলৰ ওপৰত নিৰ্ভৰ কৰিবলৈ বাধ্য হৈছে।
উল্লেখ্য য়ে, নিৰ্বাচনৰ ফলাফলত ভাৰতীয় জাতীয় কংগ্ৰেছ দলৰ নেতৃত্বত বিৰোধী INDIA মিত্ৰজোঁটে পূৰ্বানুমানতকৈ বহু ভাল প্ৰদৰ্শন কৰে। ৰাহুল গান্ধীয়ে দাবী কৰে যে মোদীৰ শিবিৰৰ ভিতৰত বৃহৎ অসন্তুষ্টিৰ সৃষ্টি হৈছে আৰু তেওঁৰ শিবিৰত আমাৰ সৈতে যোগাযোগত থকা লোক আছে।
বিজেপিয়ে নিৰ্বাচনী প্রচাৰত ঘৃণাৰ বীজ সিঁচি দিছিল আৰু তাক লৈ বিজেপিৰ সহযোগী দলসমূহে সন্তুষ্ট নহয়৷ দেশৰ জনতাৰ দৰেই অনেক ৰাজনৈতিক দলেই বিভেদ আৰু ঘৃণাৰ ৰাজনীতি পচন্দ নকৰে। দেশৰ জনতায়ো বিজেপিৰ বিভেদকামী আৰু ঘৃণাৰ ৰাজনীতি প্রত্যাখ্যান কৰিছে। সেয়া নিৰ্বাচনী ফলাফলতে প্রকট হৈছে বুলিও দাবী কৰে ৰাহুল গান্ধীয়ে। সেয়ে বিজেপিৰ মিত্ৰ দলসমূহক লগত লৈ প্ৰধানমন্ত্ৰী নৰেন্দ্ৰ মোদীয়ে চৰকাৰ বৰ্তাই ৰখাটো কঠিন হ’ব বুলি ভৱিষ্যদ্ববাণী কৰিছে ৰাহুল গান্ধীয়ে।অৱশ্যে ৰাহুল গান্ধীৰ এই ভৱিষ্যদ্ববাণী কিমান শুদ্ধ হয় সেয়া পৰৱৰ্তী সময়তহে স্পষ্ট হ’ব।
