কোকৰাঝাৰ লোকসভা সমষ্টিৰ পৰা বি পি এফ প্ৰাৰ্থী প্ৰমীলা ৰাণী ব্ৰহ্মৰ জয় নিশ্চিত বুলি বহস্পতিবাৰে সাংবাদিকৰ আগত দাবী কৰে বি পি এফৰ মুৰব্বী তথা বি টি এ ডি প্ৰধান হাগ্ৰামা মহিলাৰীয়ে।
বৃহস্পতিবাৰে কোকৰাঝাৰৰ আৰণাই হোটেলত বি পি এফৰ এখন গুৰুত্বপূৰ্ণ বৈঠক অনুষ্ঠিত হয়। উক্ত বৈঠকৰ পাছতে বি পি এফ প্ৰধান মহিলাৰীয়ে সাংবাদিকৰে হোৱা কথা বতৰাত কোকৰাঝাৰ সমষ্টিৰ পৰা প্ৰমীলা ৰাণী ব্ৰহ্মই প্ৰায় পাঁচ লাখ ভোট লাভ কৰি বিজয়ী হ’ব বুলি মন্তব্য কৰে।
তেওঁ লগতে বৰ্তমানৰ সাংসদ তথা কোকৰাঝাৰ সমষ্টিৰ নিৰ্দলীয় প্ৰাৰ্থী নৱ কুমাৰ শৰণীয়াই চাৰি লাখ ভোট লাভ কৰি দ্বিতীয় স্থানত আৰু য়ু পি পি এলৰ প্ৰাৰ্থী উৰ্খাও ব্ৰহ্মই ৩ লাখ ভোট লাভ কৰি তৃতীয় স্থানত থাকিব বুলি কয়।
তৃতীয় পৰ্যায়ত অনুষ্ঠিত হোৱা কোকৰাঝাৰ সমষ্টিটোৰ পৰা বি পি এফৰ প্ৰাৰ্থীগৰাকীৰ বিজয় এশ শতাংশই নিশ্চিত বুলি দাবী কৰি অসমত বিজেপি-অগপ-বি পি এফৰ মিত্ৰজোঁটে ১০ৰ পৰা ১২ খন আসন লাভ কৰিব বুলিও সাংবাদিকৰ আগত মন্তব্য কৰে।
উল্লেখ্য যে তৃতীয় পৰ্যায়ত অনুষ্ঠিত হৈ যোৱা কোকৰাঝাৰ সমষ্টিৰ লোকসভা নিৰ্বাচনৰ ভোটগ্ৰহণ সম্পৰ্কে বৃহস্পতিবাৰে বি পি এফ দলৰ বিভিন্ন নেতা-কৰ্মীৰে হাগ্ৰামা মহিলাৰীয়ে এক পৰ্যালোচনামূলক সভা অনুষ্ঠিত কৰে।
উক্ত সভাত ৰাজ্যসভাৰ সাংসদ বিশ্বজিৎ দৈমাৰী, দলৰ উপ-সভাপতি প্ৰবীন বড়ো, কোকৰাঝাৰ সমষ্টিৰ বি পি এফৰ প্ৰাৰ্থী তথা বিধায়িকা প্ৰমীলা ৰাণী ব্ৰহ্মৰ লগতে আন আন শীৰ্ষ পৰ্যায়ৰ নেতা-কৰ্মী উপস্থিত থাকে।
২৩ এপ্ৰিলত অনুষ্ঠিত হৈ যোৱা নিৰ্বাচনত কোকৰাঝাৰ সমষ্টিত ৮৩.২ শতাংশ ভোটাৰে নিজৰ ভোটাধিকাৰ সাব্যস্ত কৰে।
