কাজিৰঙাৰ চেপেনাকোবোৱা গাঁৱৰ ছাত্ৰী মৃদুস্মিতা গগৈ বন বিভাগৰ ৰাজ্যিক জৈৱ বৈচিত্ৰ আয়োগৰ সংৰক্ষন অভিযানৰ ব্ৰেণ্ড এম্বেচাদৰ হিচাপে নিৰ্বাচন কৰা হৈছে। কাজিৰঙা ৰাষ্ট্ৰীয় উদ্যানত ১৪ মাৰ্চৰ পৰা তিনিদিয়াকৈ অনুষ্ঠিত বন আৰু বন্যপ্ৰাণী সংৰক্ষণৰ আৱাসিক কৰ্মশালাত ছাত্ৰী গৰাকীৰ কণ্ঠৰ গীত শুনি অভিভূত হোৱা প্ৰধান মুখ্য বন সংৰক্ষক এ কে জহৰিয়ে এই ঘোষণা কৰে।
ইয়াৰ পৰিপ্ৰেক্ষিতত অচিৰেই বন আৰু বন্যপ্ৰাণী সংৰক্ষনৰ বাবে মৃদুস্মিতা গগৈৰ কণ্ঠত গীত বানীবদ্ধ কৰাৰ কথাও ঘোষণা কৰে প্ৰধান মুখ্য বন সংৰক্ষক গৰাকীয়ে।
উল্লেখযোগ্য যে কাজিৰঙা ৰাষ্ট্ৰীয় উদ্যানত ১৪ মাৰ্চৰ পৰা চলি থকা নেচাৰ অৰিয়েন্টেশ্যন ইনিচিয়েটিভ নামৰ প্ৰকৃতি সংৰক্ষণৰ আৱাসিক কৰ্মশালা ১৬ মাৰ্চত সামৰনি পৰে। কৰ্মশালাখনৰ দ্বিতীয় দিনা ফ্ৰান্সৰ এক সঁজাতি দলৰ সৈতে এ কে জহৰিৰ লগতে ৰাষ্ট্ৰীয় গ্ৰামীন বিকাশ নিধিৰ ৰসনা যাদবে অংশগ্ৰহণ কৰে।
কাজিৰঙাৰ ডি এফ অ’ ৰোহিনী বল্লভ শইকীয়াই আঁত ধৰা অনুষ্ঠানত ফ্ৰান্সৰ প্ৰতিনিধিৰ দলটোয়ে আৱাসিক শিৱিৰৰ ছাত্ৰ-ছাত্ৰীৰ সৈতে বাৰ্তালাপ কৰে।
উল্লেখযোগ্য যে দ্বাদশ বছৰৰ বাবে অনুষ্ঠিত এই আৱাসিক কৰ্মশালাটোত কাজিৰঙাৰ ৫ টা বনাঞ্চলৰ লগতে বিশ্বনাথ বন সংমণ্ডলৰ পৰা অহা ৪১ গৰাকী ছাত্ৰ-ছাত্ৰীয়ে অংশগ্ৰহণ কৰিছিল। তিনি দিনীয়া এই কৰ্মশালাত ছাত্ৰ-ছাত্ৰীক বন আৰু বন্যপ্ৰাণী সংৰক্ষণৰ বিভিন্ন প্ৰশিক্ষণৰ লগতে কাজিৰঙা ৰাষ্ট্ৰীয় উদ্যান আৰু পানবাৰী সংৰক্ষিত বনাঞ্চলত পক্ষী নিৰীক্ষণৰ বাবে নিয়া হয়।
ৰাজ্যৰ আগশাৰীৰ প্ৰকৃতি সংগঠন আৰণ্যক, বিশ্ব প্ৰকৃতি নিধি, ৱাইল্ড লাইফ ট্ৰাষ্ট অব ইণ্ডিয়া, ভূমি আৰু কৰবেট ফাইণ্ডেশ্যনৰ যুটিয়া উদ্যোগত আয়োজিত এই আৱাসিক কৰ্মশালাৰ সামৰণিৰ দিনা অনুষ্ঠিত সমাৱৰ্তন সমাৰোহত কাজিৰঙাৰ নৱ নিযুক্ত সঞ্চালক পি শিৱকুমাৰ সপৰিবাৰে উপস্থিত থাকে।
