ইটোৰ পিছত সিটোকৈ বৰ্বৰ-নৃশংস হত্যাকাণ্ডই জোকাৰি গৈছে দেশ। দিল্লীত সংঘটিত হত্যাকাণ্ডই দেশত তুমুল চৰ্চা লাভ কৰাৰ সময়তে এইবাৰ পোহৰলৈ আহিছে নৱী মুম্বাইত সংঘটিত আন এক পাশৱিক হত্যাকাণ্ডৰ ঘটনা। এগৰাকী বিবাহিত মহিলাই বাৰে বাৰে বিবাহৰ প্ৰস্তাৱ আগবঢ়োৱাত অতিষ্ঠ হৈ হত্যা কৰাৰ অভিযোগ উঠিছে এগৰাকী ব্যক্তিৰ বিৰুদ্ধে।
নৱী মুম্বাইৰ হাউছিং কমপ্লেক্সৰ এগৰাকী ৪০ বৰ্ষীয় চিকিউৰিটি গাৰ্ডৰ বিৰুদ্ধে উঠিছে এই হত্যাৰ অভিযোগ। ইতিমধ্যে অভিযুক্ত ৰাজকুমাৰ বাবুৰাম পাল নামৰ ব্যক্তিগৰাকীক গ্ৰেপ্তাৰ কৰিছে আৰক্ষীয়ে।
ঘটনা সন্দৰ্ভত এগৰাকী জ্যেষ্ঠ আৰক্ষী বিষয়াই জানিবলৈ দিয়া মতে, যোৱা ১২ ফেব্ৰুৱাৰীত থানে জিলাৰ নৱী মুম্বাই চহৰৰ কোপাৰখাইৰ্নে অঞ্চলৰ এখন হাউছিং ছ’চাইটিৰ সমীপৰ জোপোহাৰ মাজত ৩৫-৪০ বছৰ বয়সৰ এগৰাকী অচিনাক্ত মহিলাৰ মৃতদেহ উদ্ধাৰ হৈছিল।
মহিলাগৰাকীক ডিঙিত পৰিধান কৰা দীঘল কাপোৰৰ টুকুৰাৰে ডিঙি চেপি হত্যা কৰা হৈছিল আৰু মৃতদেহটো জোপোহাত পেলাই প্ৰমাণ নষ্ট কৰিবলৈ চেষ্টা কৰা হৈছিল বুলি আৰক্ষী বিষয়াগৰাকীয়ে লগতে কয়।
কোপাৰখাইৰ্নে আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে আৰু অভিযুক্তৰ বিৰুদ্ধে ভাৰতীয় দণ্ডবিধিৰ ধাৰা ৩০২ আৰু ২০১ ৰ অধীনত গোচৰ ৰুজু কৰে।
পিছত নৱী মুম্বাই আৰক্ষীয়ে মহাৰাষ্ট্ৰৰ সকলো থানালৈ মৃতদেহটোৰ পৰিচয় সন্ধানৰ বাবে বাৰ্তা প্ৰেৰণ কৰে। সেই সময়তে আৰক্ষীয়ে মুম্বাইৰ ট্ৰম্বে আৰক্ষী থানাত এগৰাকী মহিলা নিৰুদ্দেশ হোৱাৰ গোচৰ ৰুজু হোৱা বুলি জানিব পাৰে।
আৰক্ষী বিষয়াগৰাকীৰ মতে, নৱী মুম্বাইত উদ্ধাৰ হোৱা মৃতদেহ আৰু নিৰুদ্দেশ হোৱা মহিলাগৰাকীৰ বৰ্ণনাৰ মিল দেখাৰ পিছত আৰক্ষীয়ে তদন্ত তীব্ৰতৰ কৰি তোলে। আৰক্ষীয়ে নিৰুদ্দেশ হোৱা মহিলাগৰাকীৰ পৰিয়ালৰ লোকক সোধা-পোছা কৰে।
নিৰুদ্দিষ্ট মহিলাগৰাকীৰ স্বামীৰ পৰা আৰক্ষীয়ে মহিলাগৰাকীয়ে মুম্বাইৰ মানখুৰ্ড অঞ্চলত চাফাই কৰ্মী হিচাপে কাম কৰিছিল বুলি জানিব পাৰে। পিছত আৰক্ষীয়ে মহিলাগৰাকীৰ মোবাইল উদ্ধাৰ কৰে আৰু মোবাইল পৰীক্ষা কৰি তেওঁ চিকিউৰিটি গাৰ্ড পালৰ সৈতে প্ৰেমৰ সম্পৰ্কত থকা বুলি অৱগত হয়।
এই প্ৰমাণৰ ভিত্তিতে আৰক্ষীয়ে সন্দেহবশত: পালক গ্ৰেপ্তাৰ কৰে আৰু জেৰাৰ সময়ত মহিলাগৰাকীয়ে বাৰে বাৰে তেওঁক বিয়া কৰাবলৈ জোৰ আহিছিল বুলি পালে আৰক্ষীক জানিবলৈ দিয়ে। এনেদৰে নিৰন্তৰ হেঁচাত অতিষ্ঠ মহিলাগৰাকীৰ পৰা মুক্তি পোৱাৰ বাবে হত্যাৰ পৰিকল্পনা কৰে পালে।
আৰক্ষীয়ে জানিবলৈ দিয়া মতে, এই পৰিকল্পনা অনুসৰিয়েই পালে হাউছিং কমপ্লেক্সৰ ওচৰৰ এটা স্থানলৈ ফোন কৰি মাতি আনে মহিলাগৰাকীক আৰু তাতে ডিঙি চেপি হত্যা কৰে। ইয়াৰ পিছত অভিযুক্তই মৃতদেহটো হাউছিং ছ’চাইটিৰ ওচৰৰ জোপোহাত পেলাই দিয়ে বুলি বিষয়াগৰাকীয়ে কয়।
