দেশৰ নাগৰিকত্বৰ প্ৰমাণৰ আধাৰ কি? বা দেশভক্তিৰ আধাৰ কি? যদি আপুনি উচ্চাৰণ নকৰে ‘জয় শ্ৰী ৰাম’ ধ্বনি, আপুনি হৈ পৰিব পাৰে দেশদ্ৰোহী কিম্বা সন্ত্ৰাসবাদী! হয়, হিন্দুৰাষ্ট্ৰৰ ভেটি গঢ়াত নামি পৰা একাংশ হিন্দুত্ববাদীৰ বাবে এতিয়া এয়াই হৈ পৰিছে দেশভক্তিৰ প্ৰাথমিক চৰ্ত।
যদি আপুনি জয় শ্ৰী ৰাম ধ্বনি নিদিয়ে, দেশদ্ৰোহী অভিধা লভাৰ লগতে যিকোনো মুহূৰ্ততে শাৰীৰিক আক্ৰমণৰো বলি হ’ব পাৰে। দেশৰ বিভিন্ন প্ৰান্তত বিগত কেইটামান বৰ্ষৰ ভিতৰত এই ন-দেশভক্তিৰ জোৱাৰ উঠিছে, এই দেশভক্তিৰ প্ৰমাণ দিয়াত ব্যৰ্থ হৈ প্ৰহৃত হৈছে বহু লোক।
হিন্দুৰাষ্ট্ৰৰ এই প্ৰবক্তা সকলৰ নিৰ্যাতনৰ পৰা সুৰক্ষিত নহয় শিশুও। জয় শ্ৰী ৰাম ধ্বনি নিদিয়াৰ বাবে এইবাৰ আক্ৰমণৰ বলি হৈছে এটি ১০ বৰ্ষীয় শিশু। এই চৰম নিকৃষ্ট ঘটনা সংঘটিত হৈছে বিজেপি শাসিত ৰাজ্য মধ্যপ্ৰদেশত।
মধ্য প্ৰদেশৰ খাণ্ডৱাত শেহতীয়াকৈ ১০ বছৰীয়া এটি মুছলমান শিশুক টিউচনৰ বাবে গৈ থকা অৱস্থাত পথত ৰখাই ‘জয় শ্ৰী ৰাম’ ধ্বনি দিবলৈ হেঁচা প্ৰয়োগ কৰাৰ লগতে এই ধ্বনি নিদিয়াৰ বাবে শিশুটিৰ গালত শোধোৱা হয় এক প্ৰচণ্ড চৰ।
খাণ্ডৱাৰৰ উপ-আৰক্ষী অধীক্ষক অনিল চৌহানে ঘটনা সন্দৰ্ভত উল্লেখ কৰা মতে, জিলাখনৰ পান্ধানা আৰক্ষী থানাত এই অভিযোগত এক এজাহাৰ দাখিল কৰা হৈছিল।
শিশুটিৰ পৰিয়ালৰ লোকে আৰক্ষীৰ আগত দিয়া অভিযোগ মতে, তেওঁলোকৰ সন্তানে নৱোদয় বিদ্যালয়ত অধ্যয়নৰ বাবে প্ৰস্তুতি চলাই আছে আৰু এয়ে ব্যক্তিগত শিক্ষকৰ ওচৰত টিউচন লৈছিল।
টিউচনৰ বাবে গৈ থকাৰ সময়তে স্থানীয় দুৰ্গা কলনীৰ সমীপত লক্ষ্মণ ভীল নামৰ এগৰাকী ব্যক্তিয়ে পথত আগচি ধৰে আৰু ‘জয় শ্ৰী ৰাম’ ধ্বনি দিবলৈ বাধ্য কৰাইছিল।
পৰিয়ালটোৰ অভিযোগৰ ভিত্তিত আৰক্ষীয়ে ভাৰতীয় দণ্ডবিধিৰ ২৯৫-এ আৰু ৩২৩ ধাৰাৰ অধীনত অভিযুক্তৰ বিৰুদ্ধে গোচৰ ৰুজু কৰে।
ঘটনা সন্দৰ্ভত তদন্তৰ অন্তত অভিযুক্তৰ বিৰুদ্ধে ব্যৱস্থা গ্ৰহণ কৰা হ’ব বুলি মন্তব্য কৰিছে খাণ্ডৱাৰৰ উপ-আৰক্ষী অধীক্ষক অনিল চৌহানে।
