অলিম্পিয়ান জিমনাষ্ট দীপা কৰ্মকাৰৰ বৰ্তমানৰ প্ৰধান লক্ষ্যটো হ’ল টকিঅ’ অলিম্পিকৰ বাবে যোগ্যতা আহৰণ কৰা। নৱবৰ্ষৰ প্ৰথম দিনটোতে খেলুৱৈগৰাকীয়ে ত্ৰিপুৰাৰ মুখ্য মন্ত্ৰী বিপ্লৱ কুমাৰ দেৱক সাক্ষাৎ কৰাৰ সময়ত সংবাদ মাধ্যমৰ আগত এইদৰে মনৰ ভাব প্ৰকাশ কৰে।
উল্লেখ কৰিব পাৰি যে জিমনাষ্টগৰাকীয়ে আঘাতৰ বাবে প্ৰায় এবছৰ ধৰি খেলৰ পৰা আঁতৰি আছিল। কিন্তু আঘাতৰ পৰা উঠিয়ে ২০১৮ চনৰ জুলাইত তুৰস্কত হোৱা আৰ্টিষ্টিক জিমনাষ্টিকছ ৱৰ্ল্ড চেলেঞ্জত স্বৰ্ণ পদক দখল কৰি নিজৰ সক্ষমতাৰ স্পষ্ট ইংগিত দিছিল। অৱশ্যে তাৰ পিছতে আগষ্টত, ২০১৮ত জাকাৰ্টাত হোৱা এছিয়ান গেইমছত ফাইনেলত উপনীত হ’ব নোৱাৰিলে খেলুৱৈগৰাকী।
‘মোৰ এই সময়ৰ লক্ষ্য হ’ল টকিঅ’ অলিম্পিকৰ বাবে যোগ্যতা আহৰণ কৰা।‘ খেলুৱৈগৰাকীয়ে কয়।
উল্লেখযোগ্য যে অলপতে জাৰ্মানীত সমাপ্ত হোৱা আৰ্টিষ্টিক জিমনাষ্টিকছ ৱৰ্ল্ড কাপত (Artistic Gymnastics World Cup) ব্ৰঞ্জৰ পদক লাভ কৰিছিল দীপাই। দীপাই মুখ্য মন্ত্ৰী বিপ্লৱ কুমাৰ দেবক সাক্ষাৎ কৰাৰ সময়ত দুয়োজনে নতুন বছৰৰ শুভেচ্ছা বিনিময় কৰাৰ লগতে মুখ্য মন্ত্ৰীজনক দীপাই তেওঁৰ বিষয়ে লিখা এখন কিতাপ উপহাৰ দিয়ে। সাক্ষাৎকালত লগত তেওঁৰ প্ৰশিক্ষক বিশ্বেশ্বৰ দেবো আছিল।
‘আঘাতৰ পিছত দীৰ্ঘদিন খেলৰ পৰা আঁতৰি থকা বাবে মোৰ কেৰিয়াৰক লৈ বিভিন্ন ফালৰ পৰা সংশয় প্ৰকাশ কৰা হৈছিল, লগতে মোৰ বয়সক লৈও উদ্বেগ প্ৰকাশ কৰা হৈছিল আৰু সকলোৱে ভাবিছিল মোৰ কেৰিয়াৰৰ অন্ত পৰিছে।’ দীপাই কয়।
কিন্তু আঘাতৰ পিছতো পুনৰ পদক লাভ কৰাটোৱে প্ৰমাণ কৰে যে তেওঁৰ সম্ভাৱনা এতিয়াও আছে আৰু এতিয়া তেওঁৰ একমাত্ৰ লক্ষ্যটো হ’ল ২০২০ চনৰ টকিঅ’ অলিম্পিকলৈ নিৰ্বাচিত হোৱা। এইদৰে কয় ২৫ বছৰীয়া জিমনাষ্টগৰাকীয়ে।
উল্লেখযোগ্য যে দীপা হ’ল অলিম্পিকত অংশগ্ৰহণ কৰা ভাৰতৰ একমাত্ৰ মহিলা জিমনাষ্ট। দীপাই ২০১৬ চনৰ ৰিঅ’ অলিম্পিকত ভাগ লৈ চতুৰ্থ স্থান লাভ কৰিছিল। দীপাক তেওঁৰ বিৰল ক্ৰীড়া প্ৰতিভা আৰু সফলতাৰ বাবে পদ্মশ্ৰী, ৰাজীৱ গান্ধী খেল ৰত্ন বঁটা দিয়া হৈছিল।
মুখ্য মন্ত্ৰী বিপ্লৱ কুমাৰ দেবে দীপাক লৈ গৌৰৱবোধ কৰে বুলি জানিবলৈ দিয়ে আৰু তেওঁক স্বৰ্ণকন্যা আখ্যা দিয়ে।
