ৰহস্য! অপহৰণ, কেকো সাপৰ ব্যৱসায় আৰু এটা পাক ঘূৰণি খোৱা অপৰাধৰ কাহিনী
এজন যুৱকৰ অপহৰণ কাণ্ড। যুৱকজনৰ নাম মাইনা গগৈ। ঘৰ তেওঁৰ গোলাঘাটৰ মেৰাপানীত। তিনিদিন পূৰ্বে যুৱকজনক অপহৰণ হৈছিল।
যুৱকজনক মুকলি কৰি দিয়াৰ বিনিময়ত অপহৰণকাৰীয়ে বিচাৰিছিল ২০ লাখ টকাৰ মুক্তিপন।
অৱশেষত গোলাঘাটৰ বোকাখাত আৰক্ষীয়ে ওৰাং আৰক্ষীৰ সহযোগত অভিযান চলাই ওদালগুৰিৰ কোপাতি গাঁৱৰ পৰা যুৱজনক উদ্ধাৰ কৰে।
আৰক্ষীয়ে ঘটনা সংক্ৰান্তত মুস্তাফা আহমেদ নামৰ এজন লোকক গ্ৰেপ্তাৰ কৰে।
ইপিনে, আৰক্ষীয়ে মাইনা গগৈক উদ্ধাৰ কৰাৰ পাছতেই পোহৰলৈ আহিছে আন এক ঘটনা।
ঘটনা অনুসৰি, দেউতাকৰ এজন বন্ধুৰ সৈতে তেওঁ কলিয়াবৰলৈ আহিছিল। দেউতাকৰ বন্ধুজনৰ নাম নোমল চুতীয়া। লোকজনে কেকো সাপৰ ব্যৱসায়ৰ সৈতে জড়িত।
কেকো সাপ কিনিবলৈ অহা এটা দলৰ সৈতে মাইনা গগৈ কলিয়াবৰলৈ আহিছিল। ইয়াৰ পৰাই তেওঁৰ অপহৰণ হোৱা বুলি কোৱা হৈছে।
মাইনা গগৈক মুস্তাফা আহমেদ নামৰ লোকজনে আবদ্ধ কৰি ৰাখিছিল।মুস্তাফাৰ মতে মাইনাই কেকো সাপ কিনিবলৈ আহিছিল।
মুস্তাফাই জানিবলৈ দিয়া মতে, মাইনাক দেখুওৱা হৈছিল ১৬ ইঞ্চি দীঘল এডাল কেকো সাপ। কিন্তু মাইনাই চুই দিওতেই কেকো ডাল মৰি যায়। গতিকে কেকো ডালৰ দাম ২০ লাখৰ কিছু অংশহে দিবলৈ কৈছিল।
মুস্তাফা আহমেদৰ বিস্ফোৰক ভাষ্যত প্ৰকাশ পাইছে যে কেকো সাপডাল হেনো বন বিভাগৰহে আছিল।
বন বিভাগে কেকো ডাল টোপ হিচাপে দি চোৰ ধৰিবলৈ ফিৰোজ নামৰ এজন লোকক নিয়োগ কৰিছিল। উক্ত ফিৰোজে আকৌ সেই কামৰ দায়িত্ব দিছিল মুস্তাফাক।
ফিৰোজ বৰ্তনাম পলাতক হৈ আছে। তদুপৰি, মাইনা গগৈক লৈ অনা বোকাখাতৰ কেইবাজনো লোকৰ দলটোও পলাতক হৈ আছে।
বোকাখাত আৰক্ষীয়ে মুস্তাফা আহমেদক জিম্মাত লৈ এই সমগ্ৰ ঘটনাৰ তদন্ত আৰম্ভ কৰিছে।
শেহতীয়াকৈ আৰক্ষীয়ে ভাৰতীয় দণ্ডবিধিৰ ৩৬৪(এ) ধাৰাৰ অধীনত ২৬৭/১৯ নং গোটৰ এটা ৰুজু কৰিছে।
বোকাখাত আৰক্ষীয়ে ভেলাগুৰি, মেৰাপানীৰ পৰা আমিৰ হুছেইন, নূৰ হুছেইন,আজিজুৰ ৰহমান আৰু নুমল চুতীয়া নামৰ চাৰিজন লোকক গ্ৰেপ্তাৰ কৰিছে।
ঘটনাৰ তদন্তৰ পাছতহে হয়তো প্ৰকৃত ৰহস্য পোহৰলৈ আহিব ।