শোণিতপুৰৰ নাহৰবাৰী টি ফেক্টৰীলৈ ‘ইণ্ডাষ্ট্ৰি লীডাৰ’ বঁটা
অসমৰ চাহপাতৰ বাবে বিশ্বৰ বিৰল সন্মান লাভ কৰি ৰাজ্যখনলৈ গৌৰৱ কঢ়িয়াই আনিছে শোণিতপুৰৰ নাহৰবাৰী টি ফেক্টৰীয়ে। ২৯ নৱেম্বৰৰ পৰা ১ ডিচেম্বৰলৈ মুম্বাইত অনুষ্ঠিত হৈ যোৱা ৬ষ্ঠ বিশ্ব চাহ আৰু কফি সন্মিলন মেলাত অসমৰ চাহপাতে আকৌ এবাৰ অসমলৈ গৌৰৱ কঢ়িয়াই আনিবলৈ সক্ষম হয়।
২৯ নৱেম্বৰৰ পৰা ১ ডিচেম্বৰলৈ মুম্বাইৰ নেহৰু চেন্টাৰত অনুষ্ঠিত এই বিশেষ প্ৰদৰ্শনী শোণিতপুৰৰ টপীয়াস্থিত আৰু তেজপুৰ ছচিয়েল চাৰ্ভিছ ছ’চাইটিৰ দ্বাৰা পৰিচালিত নাহৰবাৰী টি ফেক্টৰীলৈ আগবঢ়োৱা হয় ‘ইণ্ডাষ্ট্ৰি লীডাৰ’ বঁটা।
কেইবাখনো ৰাষ্ট্ৰই ভাগ লোৱা এই প্ৰদৰ্শনীত ফেক্টৰীটোৰ হৈ পৰিচালন সঞ্চালক চেবিষ্টিয়ান কে ভি আৰু পৰিচালক প্ৰশান্ত কুমাৰ নাথে এই বঁটা গ্ৰহণ কৰে।
উল্লেখ্য যে মুম্বাইত অনুষ্ঠিত হোৱা এই ৬ষ্ঠ বিশ্ব চাহ আৰু কফি সন্মিলন মেলাত আমেৰিকা, দক্ষিণ আফ্ৰিকা, জাপান, চীন, থাইলেণ্ড, শ্ৰীলংকা আদি কেবাখনো ৰাষ্ট্ৰই অংশগ্ৰহণ কৰিছিল।
লক্ষণীয়ভাৱে, ইয়াৰ মাজৰ পৰাই অসমৰ চাহপাতে আন্তঃৰাষ্ট্ৰীয় সন্মান লাভ কৰিবলৈ সক্ষম হয়। আনহাতে, নাহৰবাৰী টি ফেক্টৰীৰ চাহপাতে চলিত বৰ্ষৰ আগষ্ট মাহত হংকঙত অনুষ্ঠিত আন এক সন্মিলনত ‘ৱৰ্ল্ড বেষ্ট টি’ৰ সন্মানো লাভ কৰিবলৈ সক্ষম হৈছিল।