অসম চৰকাৰৰ অভিলাষী আঁচনি ‘অসম দৰ্শন’ৰ অধীনত ৯১৫টা মঠ মন্দিৰ, মছজিদ, গীৰ্জাঘৰলৈ ১০ লাখ টকাকৈ অনুদান আগবঢ়াইছে চৰকাৰৰ।
মাৰ্ঘেৰিটা সমষ্টিৰ অন্তৰ্গত লিডু কেন্দ্ৰীয় নামঘৰও এই আঁচনিৰ পৰা ১০ লাখ টকা লাভ কৰাৰ পাছতেই বৃহত্তৰ অঞ্চলটোৰ অন্যতম নামঘৰটোৰ বৃহস্পতিবাৰে নিৰ্মাণৰ বাবে লাইখুটা স্থাপন কাৰ্যসূচী অনুষ্ঠিত হয়।
পঞ্চাশ বছৰ সম্পূৰ্ণ কৰা লিডু কেন্দ্ৰীয় নামঘৰটি নতুনকৈ প্ৰায় ৩০ লক্ষ টকা বাজেটেৰে নিৰ্মাণ কৰাৰ প্ৰস্ততি চলোৱা হৈছে। অশোক বৰদলৈৰ পৰিচালনাত নাম প্ৰসংগৰে নামঘৰটোৰ লাইখুটা স্থাপন কৰা হয়।
সেই উপলক্ষে লিডু কেন্দ্ৰীয় নামঘৰ পৰিচালনা সমিতিৰ সভাপতি তৰুণ গগৈৰ পৰিচালনাত অনুষ্ঠিত সভাৰ আৰম্ভণিতে উদ্দেশ্য ব্যাখ্যা কৰি সম্পাদক ৰাণাজ্যোতি নেওগে লিডু কেন্দ্ৰীয় নামঘৰটোৰ নতুনকৈ নিৰ্মাণ কৰাৰ বাবে ইতিমধ্যে অসম দৰ্শন আঁচনিৰ ১০ লক্ষ টকা, শামুকজান গাওঁ পঞ্চায়তৰ ৫ লক্ষ টকা, বিধায়ক ভাস্কৰ শৰ্মাৰ আঢ়ৈ লাখ, বুবুল বৰুৱা সুনীল গুৰুঙৰ ৩ লক্ষ টকাকৈ লগতে বিভিন্ন জনৰ পৰা এতিয়ালৈকে প্ৰায় ডেৰ লাখ টকাৰ প্ৰতিশ্ৰুতি লাভ কৰাৰ কথা জানিবলৈ দিয়ে ৷
মাংগলিক অনুষ্ঠানটোত অতিথি ৰূপে উপস্থিত থাকি মাৰ্ঘেৰিটা আঞ্চলিক পঞ্চায়তৰ সভাপতি সুখদেৱ শৰ্মাই অসম চৰকাৰৰ অসম দৰ্শন আচঁনিত লিডু কেন্দ্ৰীয় নামঘৰ অন্তৰ্ভুক্ত হোৱাত সন্তষ্টি প্ৰকাশ কৰাৰ লগতে ইয়াৰ বাবে স্থানীয় বিধায়কক ধন্যবাদ জ্ঞাপন কৰে৷
তেওঁ এই আঁচনিৰ জৰিয়তে ৰাজ্যৰ ৯১৫টা অনুষ্ঠানক ১০ লাখ টকাকৈ দিয়াৰ ব্যৱস্থা কৰাত মুখ্য মন্ত্ৰী সৰ্বানন্দ সোণোৱাল আৰু বিত্তমন্ত্ৰী ড° হিমন্ত বিশ্ব শৰ্মাৰ শলাগ লয়৷
অনুষ্ঠানত বৰগোলাই জিলা পৰিষদৰ সদস্য দিবাকৰ ঠাকুৰ, লিডু গাওঁ পঞ্চায়তৰ সভাপতি শিবু দাস, বিশিষ্ট ব্যক্তি দীননাথ দুৱৰা, সোমেশ্বৰ নেওগ, লোকনাথ কোঁৱৰ ভোলা দত্ত, ডম্বৰুধৰ নেওগ, লক্ষ্যধৰ চৌধুৰী, অন্যতম দাতা তথা যুৱ সমাজকৰ্মী তথা বিকাশ বৰুৱা সঞ্জীৱ চেতিয়া আদি উপস্থিত থাকে ৷
