চন্দ্ৰৰ দক্ষিণ মেৰুত পদাৰ্পনৰ পিছত নিঃশেষ হৈছিল শক্তি! নাছাই প্ৰেৰণ কৰা লেণ্ডাৰৰ ‘অকাল মৃত্যু’

নাছাৰ লেণ্ডাৰ ‘এথেনা’ই চন্দ্ৰৰ অন্ধকাৰ আৰু বিপদজনক দক্ষিণ মেৰুত অৱতৰণ কৰাৰ পিছতো কাম কৰিব নোৱাৰিলে। চন্দ্ৰপৃষ্ঠতে ঘটিল ইয়াৰ ‘অকাল মৃত্যু’! ছচিয়েল মিডিয়াত পোষ্ট কৰি নাছাই এই কথা ঘোষণা কৰিছে।

আমেৰিকাৰ মহাকাশ সংস্থাটোৱেও এথেনাই কিয় ইমান প্ৰতিকূলতাৰ সন্মুখীন হ’বলগীয়া হ’ল তাকো প্ৰকাশ কৰিছে। কোৱা হৈছে যে চন্দ্ৰত অৱতৰণ কৰাৰ পিছত লেণ্ডাৰৰ সন্মুখভাগ কিবা কাৰণত চন্দ্ৰপৃষ্ঠৰ গহ্বৰত সোমাই গৈছিল। ফলত ই শক্তিহীন হৈ পৰে আৰু কাম কৰাৰ ক্ষমতা হেৰুৱাই পেলায়। যাৰ বাবে লেণ্ডাৰখন অকালতে নিষ্ক্ৰিয় হৈ পৰে।

চন্দ্ৰৰ দক্ষিণ মেৰুৰ বিষয়ে বিজ্ঞানীসকলে দীৰ্ঘদিন ধৰি কৌতুহলী হৈ আহিছে। এই স্থানটো ইমানেই ৰহস্যময় যে ইয়াৰ বিষয়ে প্ৰায় একোৱেই জনা নাযায়। এই দক্ষিণ মেৰুৰ ওপৰত পোহৰ পেলাবলৈ ইছৰ’ই চন্দ্ৰযান-২ পঠিয়াইছিল। অৱশ্যে সেইখন সঠিকভাৱে অৱতৰণ কৰিব পৰা নাছিল। ফলত মিছনটো বিফল হয়।

কিন্তু চেষ্টা কৰিলে ব্যৰ্থ নহয়। চন্দ্ৰযান-৩য়ে এতিয়া তাত কাম কৰি আছে। চন্দ্ৰৰ সেই অংশৰ তথ্য আহৰণৰ বাবে নাছাইও অহৰহ যান প্ৰেৰণ কৰি আছে। তেওঁলোকৰ এটা মিছন হৈছে ইনটুইটিভ মেচিন-২ বা আই এম ২। ইয়াৰ অংশ হিচাপে ‘এথেনা’ লেণ্ডাৰখনে চন্দ্ৰৰ মাটি স্পৰ্শ কৰিছিল। কিন্তু হিচাপ-নিকাচৰ সামান্য ভুলৰ বাবে মহা বিপৰ্যয়ৰ সৃষ্টি হয়।

নাছাৰ পোষ্ট অনুসৰি এই লেণ্ডাৰখন লক্ষ্যস্থানৰ পৰা প্ৰায় ২৫০ মিটাৰ দূৰত্বত থকা মুন মাউণ্টেন অঞ্চলত অৱতৰণ কৰে। কিন্তু তাৰ পিছত ই চন্দ্ৰৰ ক্ৰেটাৰ বা গহ্বৰত সোমাই যায়। লেণ্ডাৰৰ বেটাৰী থকা অংশটো গাঁতত সোমাই গ’ল। ফলত ই সম্পূৰ্ণ আন্ধাৰত ডুব গ’ল, সূৰ্য্যৰ পৰা কোনো পোহৰ নাপালে। লগতে এই অঞ্চলটো অতি ঠাণ্ডা আৰু ইয়াৰ বতৰৰ পৰিস্থিতি প্ৰতিকূল। ফলত এথেনাই কোনো ধৰণে শক্তি আহৰণ কৰি পৰা নাছিল। যাৰ বাবে ই ক্ৰমান্বয়ে শক্তি হেৰুৱাই পেলায়।

ইয়াৰ পিছত ই আৰু কোনো কাম কৰিবলৈ সক্ষম নহ’ল। কিন্তু ইয়াৰ ‘মৃত্যুৰ’ আগলৈকে এথেনাই নাছাৰ কণ্ট্ৰল ৰুমলৈ কেইবাখনো ছবি প্ৰেৰণ কৰিছিল। নাছাই ছ’চিয়েল মিডিয়াতো সেইবোৰ পোষ্ট কৰিছিল। কিন্তু একাংশ বিজ্ঞানীৰ মতে এথেনাৰ বিফলতাই চন্দ্ৰ অভিযানৰ লগত জড়িত চিন্তা বৃদ্ধি কৰিছে।