জম্মু-কাশ্মীৰৰ পুলৱামাত জে’শ্ব-এ-মহম্মদৰ আত্মঘাতী আক্ৰমণৰ ঘটনাৰ প্ৰতিবাদত আৰু নিহত জোৱানসকললৈ শ্ৰদ্ধাঞ্জলীৰূপে ১৮ ফেব্ৰুৱাৰিত দেশজুৰি ব্যৱসায় বন্ধৰ আহ্বান জনাইছে কনফে’দাৰে’চন অৱ অল ইণ্ডিয়া ত্ৰে’দাৰ্ছ (Confederation of All India Traders)এ।
সৰ্বভাৰতীয় ব্যৱসায়ী সন্থাটোৰ আহ্বানৰ প্ৰতি সঁহাৰি জনাই উত্তৰ-পূবৰ ব্যৱসায়িক প্ৰাণকেন্দ্ৰ গুৱাহাটীৰ লগতে অঞ্চলটোৰ ব্যৱসায় প্ৰতিষ্ঠানসমূহো বন্ধ থাকিব। “পে’ট্ৰল পাম্পসমূহকো বন্ধ পালন কৰিবলৈ আহ্বান জনোৱা হৈছে,” নৰ্থ ইষ্ট নাও-ক জনায় চি এ’ আই তিৰ বন্ধক সমৰ্থন কৰা অসম চে’ম্বাৰ্ছ অৱ কমাৰ্চৰ অধ্যক্ষ, অসম বিজেপিৰ মুখপাত্ৰ ৰূপম গোস্বামীয়ে।
ব্যৱসায়ী সংস্থাটোৱে লগতে জনায় যে শান্তিপূৰ্ণভাৱে পালন কৰিব লগা ব্যৱসায় বন্ধৰ সময়ত তেওঁলোকে দিনজুৰি অনশন কৰাৰ লগতে পুলৱামা বিস্ফোৰণত নিহত জোৱানসকলৰ পৰিয়ালৰ বাবে দান-বৰঙনিও সংগ্ৰহ কৰিব।
মৃত জোৱানসকলৰ প্ৰতি শ্ৰদ্ধা জনাই ব্যৱসায়িক প্ৰতিষ্ঠানসমূহত বন্তি প্ৰজ্বলনৰো আহ্বান জনোৱা হৈছে।
অৱশ্যে ব্যৱসায়ী সংগঠনটোৰ উদ্ধৃতিৰে দ হিন্দু বিজিনেছ লাইন-এ প্ৰকাশ কৰা বাতৰিত বন্ধৰ পৰা অত্যাৱশ্যকীয় সেৱা আৰু যান-বাহনসমূহ ৰেহাই দিয়া বুলি কোৱা হৈছে।
ঘটনাটোত শোক প্ৰকাশ কৰি শনিবাৰেও গুৱাহাটীৰ ব্যৱসায়ৰ প্ৰাণকেন্দ্ৰ ফাঁচি বজাৰৰ লগতে অসমৰ বিভিন্ন চহৰৰ ব্যৱসায়িক প্ৰতিষ্ঠান বন্ধ আছিল।
