যোৱা তিনি বছৰত নাগৰিকত্ব ত্যাগ কৰিছে প্ৰায় ৪ লাখ ভাৰতীয়ই!
দেশবাসীক নৰেন্দ্ৰ মোদীৰ বিকাশৰ স্বপ্নই স্পৰ্শ কৰা নাই নে ভাৰতত থাকি হতাশাত ভুগিছে ভাৰতীয় সকলে ? মঙ্গলবাৰে কেন্দ্ৰীয় চৰকাৰে সংসদত দাখিল কৰা এক প্ৰতিবেদনৰ পিছত এই প্ৰশ্ন বাৰুকৈয়ে চৰ্চিত হৈছে।
সংসদত দাখিল কৰা কেন্দ্ৰ তথ্য অনুসৰি যোৱা তিনি বছৰত প্ৰায় ৪ লাখ ভাৰতীয়ই নাগৰিকত্ব ত্যাগ কৰি অন্য দেশৰ নাগৰিকত্ব গ্ৰহণ কৰিছে।
এই তিনিটা বছৰত ভাৰতীয় নাগৰিকত্ব ত্যাগ কৰা লোকৰ সংখ্যা হৈছে মুঠ ৩,৯২,৬৪৩ জন।
সংসদত উত্থাপন হোৱা এক প্ৰশ্নৰ লিখিত উত্তৰত কেন্দ্ৰীয় গৃহ ৰাজ্যমন্ত্ৰী নিত্যানন্দ ৰায়ে কয় যে ২০১৯, ২০২০ আৰু ২০২১ চনত মুঠ ৩,৯২,৬৪৩ জন ভাৰতীয়ই তেওঁলোকৰ নাগৰিকত্ব ত্যাগ কৰিছিল।
এই তথ্য দাখিল কৰি তেওঁ লগতে কয় যে নাগৰিকত্ব ত্যাগ কৰা ভাৰতীয় লোকসকলে ১২০ খনতকৈও অধিক দেশত নাগৰিকত্ব গ্ৰহণ কৰিছে।
তেওঁলোকৰ ভিতৰত ১,৭০,৭৯৫ জন লোকে গ্ৰহণ কৰিছে আমেৰিকাৰ নাগৰিকত্ব। আনহাতে কানাডাৰ নাগৰিকত্ব গ্ৰহণ কৰিছে ৬৪,০৭১ জন লোকে।
সেইদৰে ৫৮,৩৯১ জনে অষ্ট্ৰেলিয়াত, ৩৫,৪৩৫ জন ব্ৰিটেইনত, ১২,১৩১ জনে ইটালীত, ৮,৮৮২ জনে নিউজিলেণ্ডত, ৭,০৪৬ জন, ছিংগাপুৰত ৬,৬৯০ জনে, জাৰ্মানীত ৩,৭৫৪ জনে নাগৰিকত্ব গ্ৰহণ কৰিছে বুলি মন্ত্ৰীগৰাকীয়ে জানিবলৈ দিয়ে।
আনহাতে মন্ত্ৰীগৰাকীয়ে দাখিল কৰা তথ্য অনুসৰি পাকিস্তানতো ৪৮ জন লোকে নাগৰিকত্ব গ্ৰহণ কৰিছে।
যোৱা বৰ্ষত মুঠ ১,৬৩,৩৭০ জন ভাৰতীয়ই ভাৰতীয় নাগৰিকত্ব ত্যাগ কৰি আন দেশৰ নাগৰিকত্ব গ্ৰহণ কৰিছিল।
সেইদৰে ২০১৯ আৰু ২০২০ চনত ভাৰতীয় নাগৰিকত্ব ত্যাগ কৰা ভাৰতীয়ৰ সংখ্যা আছিল ক্ৰমান্বয়ে ১,৪৪,০১৭ আৰু ৮৫,২৫৬ জন।
এই লোকসকলে তেওঁলোকৰ ব্যক্তিগত কাৰণত ভাৰতীয় নাগৰিকত্ব ত্যাগ কৰিছিল বুলি ৰায়ে সংসদত দাবী কৰে।