বিশ্বৰ আগশাৰীৰ কোম্পানী নেচলেৰ জনপ্ৰিয় শিশুখাদ্য চেৰলেকত থাকে উচ্চমাত্ৰাৰ চেনি৷শেহতীয়াকৈ প্ৰকাশ পোৱা এক প্ৰতিবেদনত সবিশেষ তথ্য পোহৰলৈ আহিছে৷চুইজাৰলেণ্ডৰ তদন্তকাৰী সংস্থা পাব্লিক আইৰ মতে, কম আৰু মধ্যম আয়ৰ দেশত প্ৰচাৰিত নেচলেৰ ব্ৰেণ্ডত চেনিৰ পৰিমাণ পোৱা গৈছে। মেদবহুলতা আৰু দীৰ্ঘদিনীয়া ৰোগ প্ৰতিৰোধৰ লক্ষ্যৰে আন্তঃৰাষ্ট্ৰীয় নিৰ্দেশনাৰ বিপৰীতে নেচলেই ব্যৱসায় আগবঢ়াই নিছে।
২০২২ চনত ২৫ কোটি ডলাৰৰ উপাৰ্জন কৰা চেৰেলেকত চেনি যোগ কৰা দেখা গৈছে, গড়ে প্ৰায় ৩ গ্ৰামকৈ চেনিৰ উপস্থিতি অধ্যয়নটোত প্ৰকাশ পাইছে।ইফালে, নেচলে ইণ্ডিয়াৰ এগৰাকী মুখপাত্ৰই এক বিবৃতিত কয় যে কোম্পানীটোৱে পাঁচ বছৰ ধৰি যোগ কৰা চেনিৰ পৰিমাণ ৩০ শতাংশ পৰ্যন্ত হ্ৰাস কৰিছে।
বিবৃতিটোত কোৱা হৈছে যে – আমি নিয়মিতভাৱে আমাৰ পৰ্টফলিঅ’ পৰ্যালোচনা কৰোঁ আৰু গুণগত মান, সুৰক্ষা আৰু সোৱাদৰ সৈতে আপোচ নকৰাকৈ যোগ কৰা চেনিৰ মাত্ৰা আৰু অধিক হ্ৰাস কৰিবলৈ আমাৰ সামগ্ৰীসমূহৰ উদ্ভাৱনশীলতা অব্যাহত ৰাখিছোঁ।
প্ৰতিবেদনৰ পাছত আন দেশত যোগ কৰা চেনি তলত দিয়া ধৰণে পোৱা গৈছে –
থাইলেণ্ড – ৬ গ্ৰাম
ইথিওপিয়া – ৫ গ্ৰাম
দক্ষিণ আফ্ৰিকা – ৪ গ্ৰাম
ব্রাজিল – গড়ে ৩ গ্রাম
ইণ্ডোনেছিয়া – ২ গ্ৰাম
মেক্সিকো – ১.৭ গ্ৰাম
নাইজেৰিয়া, চেনেগাল – ১ গ্ৰাম
ফিলিপাইনছত শিশুক লক্ষ্য কৰি তৈয়াৰ কৰা সামগ্ৰীত কোনো ধৰণৰ চেনি যোগ কৰা হোৱা নাই।ফলাফলত ব্ৰিটেইনকে ধৰি নেচলেৰ ইউৰোপৰ মূল বজাৰসমূহতো সৰু ল’ৰা-ছোৱালীৰ বাবে প্ৰস্তুত কৰা খাদ্যত কোনো যোগ কৰা চেনি(Added Suger) পোৱা নগ’ল।
পাব্লিক আই-এ এছিয়া, আফ্ৰিকা আৰু লেটিন আমেৰিকাত বিক্ৰী হোৱা চুইজাৰলেণ্ডৰ বহুজাতিক কোম্পানীটোৰ শিশু খাদ্য সামগ্ৰীৰ নমুনা পৰীক্ষাৰ বাবে বেলজিয়ামৰ পৰীক্ষাগাৰলৈ প্ৰেৰণ কৰাৰ পাছতে এই ফলাফল পোৱা গৈছে।ইউৰোপীয় অঞ্চলৰ বাবে বিশ্ব স্বাস্থ্য সংস্থাৰ গাইডলাইন অনুসৰি তিনি বছৰৰ তলৰ শিশুৰ বাবে কোনো খাদ্যত যোগ কৰা চেনি বা মিঠাজাতীয় দ্ৰব্যৰ দিয়া অনুচিত।
