গোলাঘাট জিলাবাসীৰ এক দীৰ্ঘদিনীয়া দাবী আছিল যে ৰাজধানী এক্সপ্ৰেছ ট্রেইনখন জিলাখনৰ ফৰকাটিং জংচনত অলপ সময়ৰ বাবে ৰওক। অৰ্থাৎ ফৰকাটিং জংচনত ৰাজধানী এক্সপ্ৰেছৰ এটা ষ্টপেজ হওঁক।
এই দাবী পূৰণৰ বাবে জিলাখনৰ ছাত্ৰ সন্থাৰ লগতে বিভিন্ন সংগঠনে দীৰ্ঘদিন ধৰি ৰে’লৱে বিভাগৰ ওচৰত দাবী উত্থাপন, স্মাৰকপত্ৰ প্ৰদান কৰি আহিছিল।
অৱশেষত জিলাখনৰ জনসাধাৰণৰ উক্ত আশা পূৰণ কৰি আজি উত্তৰ-পূব সীমান্ত ৰে’ল বিভাগৰ মলিগাঁওস্থিত মূখ্য কাৰ্য্যালয়ে (NFR.ZN/NFR/IN) তিনিচুকীয়া কাৰ্য্যালয়ক CNL/09/05/2019 নম্বৰৰ এক বাৰ্তাৰ জৰিয়তে ৰাজধানী এক্সপ্ৰেছ ট্ৰেইনখন ফৰকাটিং জংচনত দুই মিনিট সময় ৰোৱাৰ এক নিৰ্দেশনা জাৰি কৰে।
তাৎক্ষণিকভাৱে প্ৰযোজ্য হোৱাকৈ প্ৰেৰণ কৰা ৰে’ল বিভাগৰ উক্ত নিৰ্দেশনা সদৰী হোৱাৰ লগে লগে এতিয়া গোলাঘাটৰ জনসাধাৰণৰ মাজত আনন্দৰ লহৰ উঠিছে।
উল্লেখযোগ্য যে আজি পৰ্যন্ত জিলাখনত ৰাজধানী এক্সপ্ৰেছৰ কোনো ষ্টপেজ নথকাৰ বাবে ইয়াৰ যাত্ৰীসকলে মৰিয়নি অথবা গুৱাহাটী যাব লগা হৈছিল আৰু এইক্ষেত্ৰত ৰোগী ,মহিলা, বয়োজ্যেষ্ঠ ব্যক্তিসকল বিশেষ অসুবিধাৰ সন্মুখীন হৈ আহিছিল।
