লকডাউনৰ সময়ছোৱাত উত্তৰ-পূব সীমান্ত ৰে’লৱেই ৮০খনতকৈ অধিক শ্ৰমিক স্পেচিয়েল ট্ৰেইনৰ জৰিয়তে বহিঃ ৰাজ্যত থকা উত্তৰ-পূবৰ প্ৰায় ১,২৫,০০০ লোকক নিজ ঠাইলৈ ঘূৰাই আনিছে।
উত্তৰ-পূব ৰে’লৱেৰ মুখ্য জনসংযোগ বিষয়া শুভনন চাণ্ডে এই কথা জানিবলৈ দিয়ে।
’দেশৰ বিভিন্ন ঠাইত আবদ্ধ হৈ থকা উত্তৰ-পূবৰ ১৩,০০০তকৈ অধিক লোকক শীঘ্ৰে এনে আৰু ১০খন শ্ৰমিক স্পেচিয়েল ট্ৰেইনত লৈ অনা হ’ব।‘ তেওঁ কয়।
আনহাতে বিষয়া গৰাকীয়ে জনোৱা মতে উত্তৰ-পূবত আবদ্ধ হৈ থকা বাহিৰৰ লোকসকলকো তেওঁলোকৰ নিজা ৰাজ্যলৈ ওভতাই নিবৰ বাবে NF ৰে’লৱেৰ অধীনত ২৬খন শ্ৰমিক স্পেচিয়েল ট্ৰেইন আৰম্ভ কৰা হৈছে।
মেঘালয় আৰু ছিকিমক বাদ দি উত্তৰ-পূবৰ ৬খন ৰাজ্যৰ লগতে পশ্চিম বংগৰ ৭খন জিলা আৰু বিহাৰৰ ৫খন জিলাত NF ৰে’লৱেৰ অধীনত ট্ৰেইন চলে।
শুভনন চাণ্ডে জনাই যে পশ্চিম বংগ আৰু বিহাৰৰ উত্তৰ-পূব ৰে’লৱেৰ পৰিক্ষেত্ৰত ৪০০তকৈ অধিক শ্ৰমিক ট্ৰেইনৰ জৰিয়তে ৫.২৫ লাখ লোকক নিজ নিজ ঠাইলৈ লৈ যোৱা হৈছে।
