মল্লযুঁজাৰুৰ যৌন নিৰ্যাতনৰ পাছত এইবাৰ নতুন বিতর্কত সোমাই পৰিছে বিজেপিৰ সাংসদ ব্রীজ ভূষণ শৰণ সিং৷ তেওঁৰ বিৰুদ্ধে অবৈধ বালি খননৰ অভিযোগৰ তদন্তৰ নিৰ্দেশ দিছে ৰাষ্ট্ৰীয় সেউজ ন্যায়াধিকৰণে।
ব্ৰীজভূষণৰ বিৰুদ্ধে অবৈধভাৱে সৰযু নদীৰ বালি খনন আৰু বিক্ৰীৰ অভিযোগ উত্থাপন হৈছে। লগতে খনিজ সম্পদৰ অবৈধ সৰবৰাহৰ অভিযোগো উত্থাপন হৈছে।
বুধবাৰে ৰাষ্ট্ৰীয় সেউজ ন্যায়াধিকৰণৰ প্ৰধান বিচাৰপীঠে ব্ৰীজভূষণৰ প্ৰতিষ্ঠানটোৰ বিৰুদ্ধে তদন্তৰ বাবে এখন কমিটী গঠন কৰে। এই সমিতিখনত পৰিৱেশ মন্ত্ৰালয়, ৰাষ্ট্ৰীয় প্ৰদূষণ নিয়ন্ত্ৰণ ব’ৰ্ড, ৰাষ্ট্ৰীয় স্বচ্ছ গংগা মিছন, উত্তৰ প্ৰদেশ প্ৰদূষণ নিয়ন্ত্ৰণ ব’ৰ্ড আৰু গোণ্ডাৰ জিলা উপায়ুক্তৰ পৰা এজনকৈ প্ৰতিনিধি আছে।
এসপ্তাহৰ ভিতৰত সমিতিখন বৈঠকত মিলিত হৈ ব্ৰীজভূষণৰ সংস্থাটোৰ বিৰুদ্ধে তদন্তৰ কাম আৰম্ভ কৰিবলৈ নিৰ্দেশ দিয়া হৈছে।
ৰাষ্ট্ৰীয় সেউজ ন্যায়াধিকৰণৰ সন্মুখত ব্রীজভূষণৰ বিৰুদ্ধে যিসমূহ অভিযোগ উত্থাপিত হৈছে সেইবোৰ অত্যন্ত গুৰুতৰ৷
অভিযোগ অনুসৰি, উত্তৰ প্ৰদেশৰ গোণ্ডা জিলাৰ কেইবাখনো গাঁৱত অবৈধ খনন কাৰ্য্য সংঘটিত কৰিছে বিজেপি সাংসদগৰাকীয়ে। খননৰ জৰিয়তে লাভ কৰা খনিজ পদাৰ্থসমূহ অবৈধভাৱে সৰবৰাহ কৰা হৈছে। বীজভূষণে অবৈধ সৰবৰাহৰ সময়ত অভাৰলোড ট্ৰাকেৰে পথ আৰু পাটপাৰগঞ্জ দলঙৰ ক্ষতিসাধন কৰাৰ অভিযোগো উত্থাপন হৈছে।
দৰাচলতে ভাৰতীয় মল্লযুঁজ ফেডাৰেচনৰ প্ৰাক্তন মুৰব্বীগৰাকীৰ বাবে সময় ভাল চলি থকা নাই। মল্লযুঁজাৰুসকলে অনা যৌন নিৰ্যাতনৰ অভিযোগত ইতিমধ্যে মল্লযুঁজ ফেডাৰেচনৰ শীৰ্ষ পদ হেৰুৱাইছে। এই মুহূৰ্তত জামিনত তেওঁ মুক্ত যদিও যৌন নিৰ্যাতনৰ গোচৰৰ পৰা এতিয়াও তেওঁক দোষমুক্ত কৰা হোৱা নাই। ইপিনে,তাৰমাজতে আহিছে নতুন অভিযোগ। যিটোৱে বিজেপিৰ সাংসদগৰাকীক আৰু অধিক চাপত পেলাব।
