মুকেশ আম্বানীৰ ঘৰৰ কাষত বিস্ফোৰক সামগ্ৰী উদ্ধাৰ, নিয়াই ল’লে অনুসন্ধানৰ দায়িত্ব
উদ্যোগপতি মুকেশ আম্বানীৰ বাসগৃহৰ কাষত ৰখাই থোৱা এখন গাড়ীত বিস্ফোৰক সামগ্ৰী উদ্ধাৰ হোৱাৰ ঘটনাটোৱে চাঞ্চল্য সৃষ্টি কৰাৰ পাছতে ৰাষ্ট্ৰীয় অনুসন্ধানকাৰী সংস্থা নিয়াই বিষয়টো হাতত লৈছে।
কেন্দ্ৰীয় গৃহ মন্ত্ৰালয়ৰ নিৰ্দেশমৰ্মে সোমবাৰে নিয়াই এই ঘটনাটো অনুসন্ধান কৰিবলৈ আগবাঢ়িছে।
নিয়াই কেচটো পুনৰ পঞ্জীয়ন কৰিছে বুলিও সংস্থাটোৰ এগৰাকী মুখপাত্ৰই জানিবলৈ দিছে।
উল্লেখযোগ্য যে মুকেশ আম্বানীৰ দক্ষিণ মুম্বাইস্থিত বাসগৃহ ‘এনটিলা’ৰ কাষত ২৫ ফেব্ৰুৱাৰীৰ দিনা এখন স্ক’ৰপিয় ৰখাই থোৱা আছিল আৰু স্ক’ৰপিয়খনত ২০ডাল জেলেটিন ষ্টিকছ উদ্ধাৰ হৈছিল।
আৰক্ষীয়ে জানিবলৈ দিছিল ১৮ ফেব্ৰুৱাৰীত মুম্বাইৰ আইৰলি-মুলুণ্ড ব্ৰীজৰ পৰা গাড়ীখন চুৰ কৰা হৈছিল।
ইতিমধ্যে গাড়ীখনৰ গৰাকী হীৰেন মনসুখক শুকুৰবাৰে থানেৰ এটা নৰ্দমাত মৃত অৱস্থাত পোৱা গৈছে।