দেশৰ সৰ্বোচ্চ ন্যায়ালয়ৰ মুখ্য ন্যায়াধীশ এছ এ বুবদে-এ শুনানিৰ সময়ত ধৰ্ষণত অভিযুক্ত এগৰাকী ব্যক্তিক ধৰ্ষিতাক বিয়া কৰাবলৈ কোৱা নাছিল। সোমবাৰে সৰ্বোচ্চ ন্যায়ালয়ৰ মুখ্য ন্যায়াধীশগৰাকী এইদৰে কয়।
মুখ্য ন্যায়াধীশ বুবদেৰ মতে সংবাদ মাধ্যমে তেওঁৰ বক্তব্যক বিকৃত কৰি প্ৰকাশ আৰু প্ৰচাৰ কৰিছে।
মুখ্য ন্যায়াধীশ শৰদ এ বুবদে-এ লগতে কয় যে যোৱা সপ্তাহত ধৰ্ষণৰ গোচৰৰ শুনানিৰ সময়ত তেওঁ কৰা মন্তব্যবোৰ নাৰীক অসন্মান কৰি কোৱা নাছিল। তেওঁৰ মতে উচ্চতম ন্যায়ালয়ে সদায় “নাৰীৰ প্ৰতি সৰ্বোচ্চ সন্মান” প্ৰদান কৰি আহিছে।
“আমি তেওঁ(ধৰ্ষণত অভিযুক্ত)ক বিয়া কৰাবলৈ কোৱা নাছিলো। আমি তেওঁক বিয়া কৰাব নেকি বুলিহে সুধিছিলো।” মুখ্য ন্যায়াধীশ বুবদে-এ সোমবাৰে কয়।
উল্লেখ্য যে যোৱা ১ মাৰ্চত ধৰ্ষণত অভিযুক্ত মহাৰাষ্ট্ৰৰ এগৰাকী বিষয়াৰ জামিন শুনানিৰ সময়ত উচ্চতম ন্যায়ালয়ৰ মুখ্য ন্যায়াধীশগৰাকীয়ে অভিযুক্তক বিষয়াজনে ধৰ্ষিতা কিশোৰীগৰাকীক বিয়া কৰিলে তেওঁক PCSO আইনৰ অধীনত কাৰাগাৰলৈ যোৱাৰ পৰা ৰক্ষা কৰাৰ আশ্বাস দিয়া বুলি সংবাদ মাধ্যমত প্ৰচাৰ হৈছিল।
লগতে পঢ়ক : “আপুনি তাইক বিয়া কৰালে শাস্তিৰ পৰা ৰেহাই পাব!”; ধৰ্ষণত অভিযুক্ত চৰকাৰী বিষয়াক ক’লে মুখ্য ন্যায়াধীশে
এই সমগ্ৰ বিষয়টোৱে দেশৰ সংবাদ মাধ্যমত ব্যাপক চৰ্চা লাভ কৰে। আনকি বিভিন্ন মহলত তীব্ৰ প্ৰতিক্ৰিয়াৰো সৃষ্টি হয়।
ইয়াৰ সমান্তৰালভাৱে নিৰ্যাতিতাৰ সৈতে ধৰ্ষণত অভিযুক্তক বিবাহপাশত আৱদ্ধ কৰোৱাই ধৰ্ষণকাৰীক শাস্তিৰ পৰা ৰেহাই দিবলৈ সৰ্বোচ্চ ন্যায়ালয়ে এই পদক্ষেপ লৈছে নেকি বুলি প্ৰশ্ন কৰি দেশৰ নাৰী অধিকাৰ কৰ্মী, বিশিষ্ট নাগৰিক, বুদ্ধিজীৱী, লেখক, শিল্পীসহ ৫ হাজাৰ লোকৰ স্বাক্ষৰ সম্বলিত এক পত্ৰৰ যোগে মুখ্য ন্যায়াধীশ বুবদেক সমালোচনা কৰি ক্ষমা খুজিবলৈ দাবী কৰা হৈছিল।
ইয়াৰ পিছতে আজি উচ্চতম ন্যায়ালয়ৰ মুখ্য ন্যায়াধীশগৰাকীয়ে নিজৰ স্থিতি প্ৰকাশ কৰি কয় যে বিষয়টো সম্পৰ্কীয় তেওঁৰ বক্তব্যসমূহ সম্পূৰ্ণৰূপে বিকৃত কৰি সংবাদ মাধ্যমত প্ৰচাৰ কৰা হৈছে।
এয়া বৈবাহিক ধৰ্ষণৰ গোচৰ নাছিল বুলি কৈ উচ্চতম ন্যায়ালয়ে ‘নাৰীৰ প্ৰতি সৰ্বোচ্চ সন্মান’ প্ৰদান কৰি অহা বুলিও তেওঁ মন্তব্য কৰে।
